Azərbaycan, Bakı, 5 may /Trend/
İsrailin Təl-Əviv şəhərində "Ön Asiya: kütləvi informasiya vasitələri və regional münaqişələr" mövzusunda beynəlxalq konfrans işə başlayıb. Bu barədə Diasporla İş Üzrə Dövlət Komitəsinin mətbuat xidmətinin çərşənbə günü yaydığı məlumatda bildirilir.
Konfransda Azərbaycanla yanaşı ABŞ, Almaniya, Gürcüstan, Ukrayna və Rusiyadan politoloqlar, jurnalistlər və ictimai xadimlər iştirak edirlər.
Azərbaycan Respublikası Diasporla İş Üzrə Dövlət Komitəsinin və Azərbaycan - İsrail Beynəlxalq Assosiasiyasının təşkilatçılığı ilə təşkil olunmuş tədbirin məqsədi dövlət rəsmilərinin, regiondakı prosesləri dərindən bilən politoloqların və mütəxəssislərin, habelə Azərbaycan, İsrail, ABŞ, Rusiya, Ukrayna, Gürcüstanda fəaliyyət göstərən rusdilli kütləvi informasiya vasitələri rəhbərlərinin iştirakı ilə medianın münaqişələrin həllində roluna dair müzakirələr aparmaqdır.
Azərbaycanı bu tədbirdə Diasporla İş Üzrə Dövlət Komitəsinin sədri Nazim İbrahimovun rəhbərliyi ilə geniş nümayəndə heyəti təmsil edir.
Konfransı açan Azərbaycan - İsrail Beynəxalq Assosiasiyasının rəhbəri İosif Şaqal tədbirin iştirakçı dövlətlərin mətbu orqanları arasında əlaqələrin inkişafında mühüm rol oynadığını deyib.
Konfransda Dövlət Komitəsinin sədri Nazim İbrahimov çıxış edərək, Azərbaycanda həyata keçirilən islahatlar, İsrail - Azərbaycan münasibətlərinin inkişaf perspektivləri, əlaqələrin inkişafında dövlətlərimizin başçılarının rolu, Dağlıq Qarabağ münaqişəsi, İsrail - Azərbaycan arasında əlaqələrin genişlənməsində və möhkəmlənməsində diasporun rolu və digər məsələlər barədə ətraflı məlumat verib.
Knessetin deputati, "İsrail bizim evimizdir" partiyasinin Parlamentdəki fraksiyasının rəhbəri Robert İlatov Azərbaycan və İsrail dövlətləri arasındakı münasibətlərin yüksək səviyyəsini qeyd edib, ölkəsinin Azərbaycanla əlaqələrin hərtərəfli olduğunun vacibliyini vurğulayıb. R.İlatov regionda mövcud olan problemlərin həllində KİV-in rolunu qeyd edib, bu baxımdan konfransın mühüm əhəmiyyət kəsb etdiyini bildirib.
Konfrans iki gün davam edəcək.