Azərbaycan, Bakı, 24 dekabr /Trend/
AZAL ("Azərbaycan Hava Yolları" QSC) dövlət aviaşirkətinin Bakı vaxtı ilə saat 20:05-də Bakıdan Domodedovaya uçmalı olan J2 854 saylı reysi Moskvanın Domodedovo aeroportundakı partlayışa baxmayaraq, cədvəl üzrə göndəriləcək. Bu barədə Trend-ə bazar ertəsi AZAL-dan bildiriblər.
"Hazırda reysə miniş davam edir", - aviaşirkətdən deyiblər.
İlkin ehtimala görə, Domodedovo aeroportunda partlayışı intihar etməklə terrorçu törədib.
Terrorçu təyyarədən çıxan insan kütləsinin arasında olub və üzərində olan 5 kq partlayıcı maddəni işə salıb.
Domodedovo aeroportunda partlayış nəticəsində həlak olan və xəsarət alanlar var. Bunu Rusiya Aviasiyası İdarəsinin nümayəndəsi Sergey İzvolski təsdiq edib.
Partlayış Domodedovo aeroportunun beynəlxalq terminalında saat 16:40-da baş verib. Ölənlərin sayının 31-ə çatdığı, yaralıların isə 130 nəfər olduğu bildirilir.