Azərbaycan, Bakı, 26 noyabr /Trend/
Bu gün Fövqəladə Hallar Nazirliyi (FHN) və UNICEF-in Qəbələ rayonunda birgə həyata keçirdiyi layihə üzrə "Fəlakət riskinin təhlilinə dair yekun hesabat"ın təqdimatı olub.
Trend-in nazirliyin saytına istinadən verdiyi məlumata görə, tədbirdə fövqəladə hallar nazirinin müavini Faiq Tağızadə çıxış edərək bildirib ki, 2009-cu il martın 9-da FHN və BMT-nin İnkişaf Proqramı arasında "Böyük Qafqaz regionunda zəif dağ icmaları tərəfindən su və daşqınlar üzrə idarəetməyə iqlim dəyişikliyi riskinin daxil edilməsi" layihəsi imzalanıb və hazırda uğurla icra olunur. FHN, Təhsil Nazirliyi və BMT-nin Uşaq Fondunun birgə əməkdaşlığı və Avropa Komissiyasının Humanitar yardım şöbəsinin maliyyə dəstəyi ilə 2010-2011-ci illər ərzində "Riskə məruz qalma ehtimalı olan ərazilərdə fəlakət riskinin azaldılmasına yönəlmiş tədbirlərin dəstəklənməsi" layihəsinin uğurla həyata keçirilməsi əməkdaşlığın bariz nümunəsidir. 2012-ci ilin oktyabr ayında isə FHN, Təhsil Nazirliyi və UNİCEF-in Azərbaycan nümayəndəliyi arasında "Riskə məruz qalma ehtimalları olan ərazilərdə fəlakət riskinin azaldılmasına yönəlmiş tədbirlərin dəstəklənməsi" layihəsinin ikinci mərhələsinin 2012-2013-cü illər üzrə Fəaliyyət Planı imzalanaraq icrasına başlanılıb və layihə uğurla tamamlanıb.
F.Tağızadə qeyd edib ki, məhsuldar əməkdaşlığın davamı olaraq "Azərbaycanda müəssisələrin və icmaların fəlakət riskinə davamlılığının artırılması" layihəsi üzrə 2014-2015-ci illəri əhatə edən Fəaliyyət Planına dair təqdim edilən təklifin Avropa Komissiyası tərəfindən qəbul edilməsi uşaq və yeniyetmələrin fövqəladə hal riskinə hazırlığı sahəsində qarşıya qoyulan hədəflərə nail olmaq sahəsində mühüm hadisədir.
UNİCEF-in Azərbaycandakı nümayəndəliyinin rəhbəri Andro Şilakadze çıxışında deyib ki, birgə layihə Fövqəladə Hallar Nazirliyi, UNICEF və Qəbələ Rayon İcra Hakimiyyəti arasında əməkdaşlığın məhsuludur. A.Şilakadze bildirib ki, UNICEF fövqəladə hallarla mübarizə sahəsində Azərbaycana yerli və qlobal səviyyədə dəstək verməyə hazırdır.