Bakı. Trend:
Sabirabad-Surra-Padar avtomobil yolunun 1-ci kilometrliyində yerləşən avtomobil körpüsü "Azəryolservis" Açıq Səhmdar Cəmiyyəti tərəfindən təmir edilib.
ASC-dən Trend-ə verilən məlumata görə, ötən əsrin 80-ci illərində inşa edilmiş avtomobil körpüsünün uzunluğu 267 metr, hər iki istiqamət üzrə 1 metr enində piyada səkiləri də daxil olmaqla, ümumi eni 8 metrdir.
Avtonəqliyyat vasitələrinin, həmçinin piyadaların daha rahat, maneəsiz və təhlükəsiz şəkildə hərəkətini təmin etmək məqsədilə aparılan təmir işləri zamanı yolun hərəkət hissəsinin və piyada səkilərinin köhnə asfalt-beton örtüyü yenisi ilə əvəzlənib.
Ümumilikdə ərazinin təqribən 2700 kv.m sahəsinə yeni asfalt-beton örtüyü döşənib. Bundan başqa, körpünün dəmir mühəccərləri də zəruri olan yerlərdə bərkidilib və rənglənib.