Bakı. Trend:
Bu gün Dini Qurumlarla İş üzrə Dövlət Komitəsi (DQİDK) və Sabunçu Rayon İcra Hakimiyyətinin birgə təşkilatçılığı ilə “Dini ekstremizmə qarşı mübarizə” mövzusunda seminar-müşavirə keçirilib.
DQİDK-dən Trend-ə verilən məlumata görə, müşavirə iştirakçıları əvvəlcə Ulu Öndər Heydər Əliyevin abidəsini ziyarət edərək,abidə önünə gül dəstələri düzüblər.
Müşavirədən öncə DQİDK-nin sifarişi ilə hazırlanan “Fitnə” sənədli filmi nümayiş olunub.
Baş Prokurorluq, Ədliyyə Nazirliyi, Daxili İşlər Nazirliyi və Dövlət Təhlükəsizliyi Xidmətinin Sabunçu, Suraxanı, Xəzər və Pirallahı rayonlarının yerli strukturlarının nümayəndələri, ziyalılar, dindarlar və ictimai fəalların iştirak etdikləri tədbiri giriş sözü ilə açan Sabunçu Rayon İcra Hakimiyyəti başçısının I müavini Güloğlan Məmmədov dini radikalizm və ekstremizmlə mübarizənin əhəmiyyətini vurğulayaraq, bu istiqamətdə həyata keçirilmiş tədbirlərin zəruri olduğundan söz açıb.
DQİDK-nin sədr müavini Səyavuş Heydərov dünyada, xüsusilə Yaxın Şərqdə dini radikalizm və ekstremizmin silahlı münaqişələrə səbəb olması və meydan gətirdiyi fəsadlar haqqında danışıb. Bildirilib ki, dinin siyasiləşdirildiyi və ya geosiyasi maraqlara alət olduğu ölkələr böyük fəlakətlərlə üzləşməkdədir.S.Heydərov çıxışında Azərbaycandakı multikultural və tolerant dəyərlərin bəşəriyyətə örnək olduğunu qeyd edib və dünyaya ixracının zəruri olduğunu vurğulayıb.
Komitənin sifarişi ilə hazırlanan “Fitnə” sənədli filmi barədə də məlumat verən Dövlət Komitəsinin sədr müavini bu filmin dini radikalizmlə mübarizənin dini, hüquqi, siyasi, psixoloji və mənəvi tərəflərini özündə ehtiva etdiyini bildirib. Filmdə dini radikalizmin təsirinə düşərək, cinayət məsuliyyətinə cəlb olunmuş insanların nümunəsində dini ekstremizmin cəmiyyətimiz üçün nə dərəcədə təhlükəli mahiyyət kəsb etdiyi bariz nümunələrlə göstərilib.
Baş Prokurorluğun idarə rəisinin müavini Novruz Hacıyev öz çıxışında dini radikalizm və onun fəsadları, eləcə də hüquqi müstəvidə aparılan mübarizə metodları haqqında geniş məlumat verib. O, cəmiyyətimizin dini radikalizmlə mübarizədə aktiv fəaliyyətinin vacibliyini vurğulayaraq, milli-mənəvi dəyərlərimizə yad olan radikal təsirlərdən qorunmaq üçün hüquqi proseslərlə yanaşı, dini maarifçilik işinin genişləndirilməsinin də zəruri olduğunu qeyd edib.
Sonra çıxış edən Daxili İşlər Nazirliyinin Baş İctimai Təhlükəsizlik İdarəsinin şöbə rəisi, polis polkovniki Əziz Baqişev təmsil etdiyi qurumun dini radikalizmlə mübarizə istiqamətində həyata keçirdiyi profilaktik və inzibati tədbirlərdən söz açıb. O, ictimai təhlükəsizliyin qorunmasında dini radikalizmə qarşı aparılan praktiki mübarizənin əhəmiyyətli rola malik olduğunu vurğulayıb. Həmçinin qeyd edib ki, ölkəmizdə bütün dinlərin və millətlərin nümayəndələri vahid ailə kimi əmin-amanlıq və sabitlik mühitində yaşamaqdadırlar. Ə.Baqişev dini radikalizmlə mübarizə istiqamətində bir sıra statistik məlumatları da dinləyicilərin diqqətinə çatdırıb.
Sonda çıxış edən Qafqaz Müsəlmanları İdarəsinin Sabunçu və Pirallahı rayonları üzrə qazısı Musa Qasımov dövlət rəhbərliyinə dindarlara göstərdiyi qayğı üçün təşəkkürünü bildirib. O, dindarların dövlət-din münasibətlərinin tənzimlənməsinə töhfə verdiklərini vurğulayaraq, ölkəmizin uğurlu gələcəyinin ancaq birlik və bərabərlik nəticəsində təmin olunacağını söyləyib.
Tədbirin yekununda M.Qasımova DQİDK-ə dövlət qeydiyyatına alınmış Sabunçu rayonu, Nardaran qəsəbəsi, “Rəhimə xanım ziyarətgahı” dini icmasının şəhadətnaməsi təqdim olunub.