Şuşa. Trend:
Ağdamda aktiv işlər görülür, burada ikinci yaşayış massivi layihəsi çərçivəsində 66 binanın tikintisinə artıq başlanılıb.
Trend xəbər verir ki, bu barədə Azərbaycan Respublikası Prezidentinin Ağdam, Füzuli və Xocavənd rayonlarında xüsusi nümayəndəsi Emin Hüseynov "Sahibkarlar üçün yeni imkanlar: Qarabağı birlikdə quraq" adlı tədbirdə deyib.
"Torpaqlarımızın mədəniyyətinin və irsinin necə bərpa olunduğunu görürük. Hökumətimiz işğaldan azad edilmiş ərazilərin bərpası və inkişafı üzərində aktiv şəkildə çalışmağa davam edir. İnanırıq ki, birgə səylərlə Qarabağı və digər rayonları bütün Azərbaycanın qürur duyacağı çiçəklənən və müasir bölgələrə çevirə biləcəyik", - o deyib.
Qeyd edək ki, tədbirin əsas məqsədi sahibkarlıq subyektlərinə Qarabağ və Şərqi Zəngəzur iqtisadi rayonlarının investisiya imkanlarını və biznes perspektivlərini təqdim etmək, həmçinin dövlət-özəl tərəfdaşlıq modelini müzakirə etməkdir. Bundan başqa, tədbirdə işğaldan azad edilmiş ərazilərdə tətbiq edilən güzəşt və üstünlüklər, digər dövlət dəstəyi tədbirləri, bu ərazilərin bərpası və iqtisadi reinteqrasiyasında sahibkarların rolu barədə panel müzakirələr təşkil olunub.
(Tərcümə: Rəna Əbdürəhmanova)