Bakı. Trend:
ADA Məktəbinə növbəti tədris ili üçün qəbul edilən ilk şagird
Dövlət İmtahan Mərkəzinin ümumi (9 illik) orta təhsil səviyyəsi
üzrə keçirdiyi buraxılış imtahanlarında ölkə üzrə ən yüksək nəticə
əldə edən Məhəbbət Nəsibova olub. Məhəbbət həm də bir ay əvvəl ADA
Universitetində keçirilən Akademik Məqsədlər üçün VI İngilis Dili
Olimpiadasında birinci yerə layiq görülüb.
Azərbaycan Respublikasının Elm və Təhsil Nazirliyi, “Baku Education
Information Center”, “BEST COMP group”, “British Summer School”un
tərəfdaşlığı ilə təşkil edilən və ingilis dilində qrammatika
biliklərinin, o cümlədən yazı, dinləmə və danışıq qabiliyyətlərinin
yoxlanıldığı olimpiadada qalib olan Məhəbbət Böyük Britaniyada iki
həftəlik “Qlobal Gənc Liderlər” kursunda ödənişsiz iştirak etmək
imkanı əldə edib.
ADA Məktəbində təhsil almaq üçün səbirsizlənən Məhəbbət müasir
təhsil yoluna ADA Məktəbi ilə birgə addımlayacağı üçün böyük
həyəcan duyduğunu ifadə edib.
Qeyd edək ki, 2019-cu ildə qurulan ADA Məktəbi 10-cu və 11-ci sinif
şagirdlərinə ingilis dilində təhsil imkanı təklif edir. ADA Məktəbi
təqdim etdiyi “IB” Beynəlxalq Diplom Proqramı ilə məzunlarının
xarici universitetlərə qəbulunu asanlaşdırır, o cümlədən respublika
fənn olimpiadalarının qaliblərinin təhsil haqqına 100%-lik güzəşt
təqdim edir. Xatırladaq ki, ADA Məktəbinin məzunları, həmçinin ADA
Universitetinə xüsusi şərtlərlə daxil olmaq hüququna
malikdirlər.