Azərbaycan, bakı, 17 avqust /Trend/
Boris Yotov dünya çempionatının yarımfinalına yüksəlib.
Azərbaycan Milli Avarçəkmə Federasiyasının mətbuat xidmətindən Trend-ə daxil olan məlumata görə, Bolqarıstanın Plovdiv şəhərində yeniyetmələr və böyüklər arasında davam edən akademik avarçəkmə üzrə dünya çempionatında Azərbaycanın yeganə təmsilçisi Boris Yotov yarımfinala yüksəlib. 16 yaşlı avarçəkənimiz yeniyetmələr arasında 1 nəfərlik qayıqla (JM1X) 2000 metr məsafəyə seçmə və ¼ final yürüşlərini uğurla keçib.
Seçmə yürüşdə finişə 7 dəqiqə 5,56 saniyəyə çatan Yotov yalnız sloveniyalı Yerney Markoviçdən (7:05.56) geri qalıb. Əvəzində idmançımız CAR təmsilçisi Ceyms Conston (7:09.29), moldovalı Vladimir Malov (7:23.49) və paraqvaylı Xose Servin Diarteni (7:35.49) geridə qoyub.
¼ finalda isə Yotov finişə hamıdan tez - 7 dəqiqə 8,77 saniyəyə çatıb. O, almaniyalı Morits Moos (7:11.13), belaruslu Pilip Pavukov (7:12.37), irlandiyalı Pol O Donovan (7:12.46), avstriyalı Mario Santer (7:27.00) və danimarkalı Nik Larseni (7:34.99) üstələyib.
Avqustun 18-də keçiriləcək yarımfinal yürüşündə avarçəkənimizin rəqibləri Martin Helset (Norveç), Qanqqanq Li (Çin), Mixal Ploçek (Çexiya), Ceyms Conston (CAR) və Pilip Pavukov (Belarus) olacaq. Yürüşə Bakı vaxtı ilə saat 12:59-da start veriləcək. İlk 3 yeri tutanlar əsas finala yüksələcəklər.
Qeyd edək ki, yeniyetmələr arasında 1 nəfərlik qayıqla (JM1X) mübarizəyə 30 avarçəkən qatılıb.