Bakı. Trend:
14-24 iyul 2018-ci il tarixlərində Rumıniyanın Kluj-Napoka şəhərində stolüstü tennis üzrə gənclər arasında Avropa Çempionatı keçirilir.
Bu barədə Trend-ə Azərbaycan Stolüstü Tennis Federasiyasından məlumat verilib.
44 ölkədən 42 kişi və 39 qadın komandasının iştirak etdiyi çempionatda oğlanlardan ibarət komandamız çempionatın 1/8 mərhələsi ilə kifayətlənməli olub. Qızlardan ibarət yığmamız isə 1/4 finalda Almaniya yığmasına, yarımfinalda isə Fransa yığmasına qalib gələrək finala vəsiqə qazanıb. Qızlardan ibarət komandamız finalda Rusiya yığması ilə görüşəcək.
Final görüşünü bu gun 20:30-da Federasiyanın rəsmi “Facebook” səhifəsindən (https://www.facebook.com/www.astf.az/) canlı izləmək mümkündür.
Xatırladaq ki, 2017-ci il stolüstü tennis üzrə gənclər arasında Avropa Çempionatında qızlardan ibarət yığmamız komanda hesabında III yer tutaraq bürünc medal, şəxsi yarışlarda isə qız tennisçimiz qızıl medal qazanıb.