Bakı. Trend:
Formula 1 üzrə dünya çempionatının 2024-cü il mövsümündə 22-ci mərhələ - Las Veqas Qran Prisi bu həftəsonu start götürür. Yarış məşhur Las Veqas şəhər trekində keçiriləcək.
Trend xəbər verir ki, son bir ayda britaniyalı Lando Norris ilə hollandiyalı Maks Verstappen arasında fərdi çempionluq uğrunda rəqabət həyəcanla izlənilirdi. Lakin Braziliya Qran Prisində Verstappen 17-ci yerdən başlayaraq möhtəşəm performansla qalib gəldi, Norris isə zəif çıxış edərək geridə qaldı. Bu nəticələrdən sonra Verstappenin Las Veqasda dördüncü çempion titulunu təmin etmək üçün böyük şansı var. Bunun üçün o, Lando Norrisdən iki xaldan çox itirməməlidir.
Konstruktorlar çempionatı isə daha gərgin mübarizə vəd edir. Hazırda McLaren 593 xalla liderdir, Ferrari 557 xalla ikinci, Red Bull isə 544 xalla üçüncü yerdədir. Çempionluq uğrundakı yarışın son mərhələyə qədər davam etməsi gözlənilir.
Las Veqas mərhələsinin proqramı cümə günü başlayır.
İlk sərbəst yürüş Bakı vaxtı ilə saat 05:30-da, ikinci isə
09:00-da keçiriləcək.
Şənbə günü üçüncü sərbəst məşq 05:30-da, kvalifikasiya isə 09:00-da
baş tutacaq.
Əsas yarış bazar günü Bakı vaxtı ilə saat 09:00-da başlayacaq.