Çinin nəhəng dövlət şirkəti CAMCE “AS Aqro”nun “Abşeron Aqro Park”ını ziyarət edib (FOTO)

Bakı. Trend:

Çinin nəhəng dövlət korparasiyası “China CAMC Engineering Co., Ltd.”nin (CAMCE) rəhbərliyi “AS Aqro” şirkətinin Hövsanda yerləşən “Abşeron Aqro Park”ını ziyarət edib.

“AS Qrup İnvestment”dən Trend-ə verilən məlumata görə, səfər zamanı CAMCE prezidenti xanım Luo Yanı şirkətin Şərqi Avropa və Orta Asiya Departamentinin rəhbəri, Rusiya, Belarus, Azərbaycan, Türkmənistan, Gürcüstan nümayəndəliyinin rəhbəri və digər rəhbər şəxslər müşaiyət edib.

Səfər 6 fevral 2018-ci il tarixində Çinin paytaxtı Pekin şəhərində “AS Aqro” şirkətinin aid olduğu “AS Qrup İnvestment” ilə CAMCE arasında “Abşeron Aqro Park” layihəsinin reallaşdırılmasına dair imzalanmış əməkdaşlıq müqaviləsinin davamı olaraq gerçəkləşdirilib. Həmin müqaviləyə əsasən Çin şirkəti Hövsan qəsəbəsindəki aqro park layihəsinə 140 milyon ABŞ dolları məbləğində vəsait cəlb edəcək.

“Abşeron Aqro Park” layihəsində görülmüş işlərlə tanış olan xanım Luo Yan “AS Qrup İnvestment”in təsisçisi Şahin Mövsümovla görüşərək aqro parkda həyata keçirilən layihələndirmə, texniki qiymətləndirmə işlərini müzakirə edib, azərbaycanlı və çinli mütəxəssislərin fəaliyyətini müsbət qiymətləndirib.

Tərəflər müqavilə əsasında görüləcək işlərin birinci fazasına bu il başlanılması barədə razılığıa gəlib.

"Abşeron Aqro Park" meyvə və tərəvəz istehsalı, çeşidlənməsi, qablaşdırılması, saxlanması və logistikası zəncirini həyata keçirən bir layihədir.

Layihə ərazisinin 150 hektarlıq hissəsində istixana kompleksinin fəaliyyəti nəzərdə tutulur və artıq təxminən 10 hektar ərazisində istixanalar istifadəyə verilib və burada pomidor və çiyələk istehsalına başlanılıb. İstixanalar ən son müasir texnologiyalarla təchiz olunub. "Abşeron Aqro Park"ın tam fəaliyyəti zamanı 3500 nəfərədək şəxs işlə təmin ediləcək. Hövsan qəsəbəsində yetişdirilən meyvə və tərəvəz yerli bazara ünvanlanmaqla yanaşı, həmçinin MDB ölkələrinə, Fars körfəzi ölkələrinə və Avropaya ixracı nəzərdə tutulub.

CAMCE 2017-ci ildə 1 milyard 750 milyon ABŞ dolları məbləğində dövriyyə həyata keçirib. Şirkətin prezidenti Luo Yan “Forbes” nəşrinə görə 2017-ci ildə ən uğurlu 100 çinli biznes xanım siyahısında 40-cı olaraq qeyd olunub.

Trend-in ən mühüm və maraqlı xəbərlərini "Telegram"da izləyin