Bakı. Trend:
İşğaldan azad edilmiş Qarabağ və Şərqi Zəngəzur müxtəlif sahələr üzrə geniş əməkdaşlıq imkanları və birgə investisiya layihələrinin reallaşdırılması üçün böyük potensiala malikdir. Burada ağıllı şəhər, ağıllı kənd konsepsiyaları əsasında müasir yaşayış məkanları formalaşdırılır.
Trend xəbər verir ki, bunu iqtisadiyyat nazirinin müavini Səməd Bəşirli bu gün Bakıda keçirilən II Azərbaycan–Türkiyə İnvestisiya Forumunda deyib.
Nazir müavini bildirib ki, bu bölgələr "yaşıl enerji" zonaları elan olunub:
"Artıq istifadəyə verilmiş Ağdam Sənaye Parkı və Araz Vadisi
İqtisadi Zonası, yeni beynəlxalq hava limanları, sürətlə qurulan
müasir nəqliyyat infrastrukturu, eləcə də biznes üçün real güzəşt
və təşviqlər bu əraziləri investorlar üçün cəlbedici edir. Bu
ərazilər geniş sənaye, kənd təsərrüfatı, logistika, turizm və
enerji sahələri üzrə yüksək potensiala malik olmaqla, uzunmüddətli
və dayanıqlı investisiya imkanları təqdim edir.
Qarabağ, Şərqi Zəngəzur və Naxçıvanın yaşıl enerji potensialının
reallaşdırılması üçün infrastrukturun yenilənməsi və yeni güclərin
qurulması əsas prioritetlərimizdəndir".
"Bu prosesdə Türkiyə biznesinin iştirakı xüsusilə diqqətəlayiqdir. Kəlbəcər və Laçın rayonlarında 4 kiçik su elektrik stansiyasının bərpası və uzunmüddətli istismarı üzrə layihənin icrası həm enerji, həm də dayanıqlı inkişaf baxımından nümunəvi əməkdaşlıq modelidir", - S. Bəşirli qeyd edib.