Azərbaycan, Bakı, 01 fevral / Trend , müxbir İ.Xəlilova / 2008-ci ilin yanvar ayı ərzində Bakı Fond Birjasında bütün alətlər üzrə aparılmış əməliyyatların ümumi həcmi üç dəfədən çox artıb, - cümə günü birjadan bildirilib. Birja əməliyyatlarının ümumi həcmi təxminən 613 mln. manat təşkil edib, bu da ötən ilin müvafiq dövrünün eyni göstəricisini 341,88 faiz üstələyir.
Əməliyyatların böyük hissəsi (99,81 faizi) dövlət qiymətli kağızlarının payına düşür.
Birja fəallığının artımı mütəşəkkil qiymətli kağızlar bazarının bütün seqmentlərində nəzərə çarpmayıb. Korporativ qiymətli kağızlar sektorunda azalma müşahidə edilib. Korporativ istiqrazların və səhmlərin təkrar bazarında həcmlərin müvafiq olaraq 51,92 faiz və 99,64 faiz azalması qeydə alınıb. Səhmlərin yerləşdirilməsində də 98,61 faizlik həcm azalması müşahidə olunub. Dövlət qısamüddətli istiqrazların (DQİ) təkrar bazarında əməliyyatlar aparılmayıb.
Ən böyük artım Notların təkrar bazarında, repo əməliyyatları sektorunda və DQİ-lərin yerləşdirilməsi üzrə qeydə alınıb.
Bütün alətlər üzrə BFB-də keçirilmiş hərracların nəticələri üzrə müqayisəli cədvəl
(yanvar, 2008)
| Bazarın seqmentləri | 2008 (31.01.08)AZN | 2007 (31.01.07)AZN | Faiz nisbəti |
| DQİ (AR MN) - (yerləşdirmə) | 9.338.999,90 | 1.131.659,08 | 825,25% |
| DQİ (AR MN) - (təkrar bazar) | 0,00 | 0,00 | - |
| Notlar (AR MB) - (yerləşdirmə) | 212.160.764,68 | 105.984.378,02 | 200,18% |
| Notlar (AR MB) - (təkrar bazar) | 66.901.322,10 | 6.979.034,96 | 958,60% |
| Repo əməliyyatlar | 323.432.575,71 | 35.303.436,34 | 916,15% |
| Cəmi DQK bazarı | 611.833.662,39 | 149.398.508,40 | 409,53% |
| Korporativ istiqrazlar - (yerləşdirmə) | 700.000,00 | 435.350,00 | 160,79% |
| Korporativ istiqrazlar - (təkrar bazar) | 67.608,00 | 140.607,88 | 48,08% |
| Səhmlər - (yerləşdirmə) | 390.500,00 | 28.193.718,00 | 1,39% |
| Səhmlər - (təkrar bazar) | 4.071,80 | 1.135.942,20 | 0,36% |
| CƏMİ | 1.162.179,80 | 29.905.618,08 | 3,89% |