Azərbaycan, Bakı, 23 may/ Trend , müxbir İ.Xəlilova/ Avropa Yenidənqurma və İnkişaf Bankı (AYİB) Azərbaycanı strateji tərəfdaş hesab edir və ölkədə layihələrin implementasiya vəziyyətindən razıdır. Bu barədə Avropa Bankı İdarəçilər Şurasının mayın 18-19-da Kiyevdə keçirilən XVII iclası çərçivəsində AYİB prezidenti Jan Lemyerin Azərbaycanın hökumət nümayəndə heyəti ilə görüşündə bildirilib.
İqtisadi İnkişaf Nazirliyindən cümə günü verilən məlumata görə, Azərbaycan həmçinin əməliyyatların həcminə görə regionda lider ölkələrdəndir. Ötən il Azərbaycanda layihələrin maliyyələşdirilməsi üçün $182 mln. ayrılıb. 2006-cı ildə isə bu $120 mln. səviyyəsində olub.
"Bank ölkədə maliyyələşdirmə həcmini genişləndirməyə hazırdır və kredit ehtiyatlarında məhdudiyyət qoymur ki, regionda gələcək investisiyalar üçün yaradılmış ehtiyatlar buna imkan verir", - nazirlikdən qeyd ediblər.
2007-ci ildə AYİB-in xalis gəliri1,1 mlrd. avro olub. Bunun 80 faizi yeni investisiya layihələrinin həyata keçirilməsinə hazırlıq üçün ehtiyata keçirilib. AYİB tarixində ilk dəfə olaraq bankın həyata keçirdiyi layihələrin dəstəklənməsində texniki əməkdaşlığın maliyyələşdirilməsi üçün nəzərdə tutulan yeni fonda 115 mln. avro ayrılması haqqında qərar qəbul edilib.
Hökumət dəmir yolu infrastrukturunun maliyyələşdirilməsi üzrə bankın təklifini qəbul edərsə, Azərbaycanda AYİB-in portfeli $500 mln. arta bilər. Bu vəsaitlər nəzərə alınmadan Avropa bankı Azərbaycanda özəl sektorun və regionların inkişafına yönəlmiş layihələrin reallaşdırılmasında maraq ifadə edir. AYİB 2008-ci ildə Azərbaycanda ümumi dəyəri 140-180 mln. avro təşkil edən 18 layihənin maliyyələşdirmə imkanlarını müzakirə edir. Onlardan səkkizi sahibkarların maliyyələşdirilməsinə yönəlmiş kiçik layihələrdir. Lakin iki-üç layihə sahibkarlıq fəaliyyətinin inkişafı ilə bağlıdır. Bank sektorunun gücləndirilməsi üçün 60 mln. avro ayrımaq planlaşdırılır. Bu vəsait kiçik və orta biznesin dəstəklənməsi, ipoteka kreditləşməsi, mikromaliyyələşdirmə üçün nəzərdə tutulub. Bu gün Avropa bankı Azərbaycanın səkkiz bankı ilə işləyir.
Azərbaycanda fəaliyyətə başladığı vaxtdan Avropa bankının Azərbaycanın layihələrindəki şəxsi maliyyələşdirmə portfeli $1 mlrd. təşkil edir. Birgə maliyyələşdirilən layihələr nəzərə alınmaqla portfel $4 mlrd.-dək çatır.
Mayın 23-nə olan rəsmi məzənnə - 0,8235 AZN/USD
Müəlliflə əlaqə saxlamaq üçün elektron ünvan: [email protected]
