Azərbaycan, Bakı, 05 iyun / Trend , müxbir U.İsmayılova/ Azərbaycanın iri sığorta şirkətlərindən biri olan "Az Sigorta" ilin sonunadək yığımları 10 mln. manata çatdırmaq niyyətindədir. Bu barədə cümə axşamı şirkətin idarə heyətinin sədr müavini Xəyal Məmmədxanlı bildirib.
"İl ərzində şirkət yığımları iki dəfə artırmaq niyyətindədir", - deyə Məmmədxanlı bildirib.
Ötən ilin yekunlarına görə, şirkət ilk dəfə olaraq yığımların həcminə görə, sığorta şirkətləri liderlərinin beşliyinə daxil olub. 2007-ci ildə şirkətin yığımları 5 mln. manat təşkil edib.
Şirkətin gözlənilən planlarından danışan Məmmədxanlı bildirib ki, yayda şirkətin "ISO 9001:2000" sertifikatını alma prosesi başa çatmalıdır. Bundan sonra "Az Sigorta" beynəlxalq reytinq əldə etmək üçün "Standard & Poor's" ilə danışıqlar aparmağa başlayacaq.
2006-cı ilin noyabrından fəaliyyət göstərən "Az Sigorta" sığortanın 28 növü üzrə xidmət təklif edir ki, bunların üçü icbaridir. Şirkətin Nizamnamə kapitalı 2 mln. manat təşkil edir. Yanvar-mart aylarının yekunlarına görə, şirkətin sığorta haqları 1,77 mln. manat, sığorta ödəmələri 0,25 mln. manat təşkil edib.
Məqalə müəllifi ilə əlaqə ünvanı: [email protected]
