Azərbaycan, Bakı, 13 iyun/ Trend , müxbir İ.Xəlilova/ Azərbaycan ərzaq məhsullarına olan daxili tələbatının 70 faizini ödəyə bilər. Bu barədə cümə günü ölkənin iqtisadi inkişaf naziri Heydər Babayev məlumat verib. Onun rəyinə görə, ölkənin kənd təsərrüfatı sektorunun inkişafı düzgün təşkil edilərsə, bu mümkün olacaq.
Ərzaq təhlükəsizliyi üzrə qlobal problem çərçivəsində bu, Azərbaycan hökuməti üçün də aktual məsələlərdən biri olub. İqtisadi inkişaf naziri bu məsələnin həll edilməsi üçün hökumətin iqtisadi blokunun digər üzvləri ilə birlikdə ərzaq təhlükəsizliyi üzrə Dövlət Proqramı layihəsi hazırlayıb. Layihə bu gün Nazirlər Kabinetinin müzakirəsinə təqdim ediləcək.
"Bu gün biz bəzi əraq növləri üzrə ixracatçıyıq. Lakin tam ixracatçı heç zaman olmayacağıq. Belə ki, ərzaq məhsullarının müəyyən hissəsini daim idxal edəcəyik", - Babayev söyləyib.
Onun rəyinə görə, Azərbaycan yaxın gələcəkdə özünü taxılla da təmin edə biləcək.
Nazir ərzağa olan daxili tələbatın yerli istehsal hesabına tamamilə ödənilməsini məqsəd hesab etmir. Belə ki, idxal məhsullarına daima tələbat olacaq. Nümunə kimi o, qış dövründə Azərbaycana idxal olunan meyvə-tərəvəz məhsullarını göstərib.
"Biz indi (yay mövsümündə) xüsusilə də Rusiya bazarına meyvə və tərəvəz ixrac edirik. Lakin artıq bir sıra ərəb ölkələrindən ərzağın tədarükünə dair təkliflər gəlir.
Bununla yanaşı, nazir problemlərin həllinə qlobal yanaşmağı da zəruri hesab edir. Bu problemlərdən biri fermer təsərrüfatları ilə bağlıdır. Babayevin sözlərinə görə, onlar iriləşməlidirlər, belə ki, hazırki vəziyyətdə onların məhsuldarlığı və ixrac imkanları aşağıdır.
"Fermer təsərrüfatlarının iriləşməsi üçün stimulverici tədbirlər görmək lazımdır, belə ki, zorla bu mümkün deyil və səmərəsizdir", - nazir hesab edir.
Azərbaycan Milli Bankı aqrar-sənaye kompleksinin bütün sahələrini dəstəkləmək üçün dövlət investisiyalarını artırmağı təklif edir və bu, yaxın 5-10 ildə hökumətin permanent kursu olmalıdır. AMB həmçinin hökumətə kənd təsərrüfatına kreditlərin ayrılması üzrə təkliflər verib. Milli Bank fermerlərin dövlətin vəsait ayırdığı kreditlər vasitəsilə dəstəklənməsini təklif edir ki, bu da kredit kooperativlərinin, ixtisaslaşmış kənd yerlərinin inkişafı üzrə bankın yaradılması ilə mümküdür.
Müəlliflə əlaqə saxlamaq üçün elektron ünvan: [email protected]
