Azərbaycan, Bakı, 13 iyun/ Azərbaycan hökuməti və Fransanın BNP Paribas bankı arasında arasında Muğanlıdan Yevlaxadək 156 km uzunluğunda avtomobil yolunun (Bakı-Şamaxı-Yevlax magistralının bir hissəsi) yenidən qurulması və 164 km uzunluğunda Yevlax-Zaqatala-Gürcüstan sərhədi yolunun ikixətlidən dördxətliyə genişləndirilməsi layihəsi üzrə cümə günü kredit sazişi imzalanıb. Bu barədə Nəqliyyat Nazirliyindən məlumat veriblər. Bank layihənin reallaşdırılmasına $320 mln. ayırır.
Hökumət bir neçə həftə ərzində layihənin son dəyərini müəyyənləşdirəcək. Belə ki, texniki-iqtisadi əsaslandırma ölkədi inflyasiya nəzərə alınmaqla tamamlanır. Layihənin dəyərinin bahalaşmasına 2008-ci ildən etibarən beynəlxalq kreditlər hesabına həyata keçirilən bütün idxal mallarına, xidmətlərə və işlərə münasibətdə əlavə dəyər vergisinin tətbiq edilməsi də təsir edəcək.
Kredit sazişini nəqliyyat naziri Ziya Məmmədov və Tərəfdaşlıq və Biznesin İnkişafı Departamentinin direktoru Sisil Bes Advani imzalayıblar.
Kredit, 4 il güzəştli dövr olmaqla, 14 il müddətinə və libor+0,45 faiz illik dərəcə ilə verilir. Tikinti işlərini dörd il ərzində başa çatdırmaq planlaşdırılır.
Bu, BNP Paribas ilə yol layihəsi üzrə birinci kredit sazişi olacaq. Bankla Hacıqabul-Yevlax yolunun tikinti layihəsinin mümkün maliyyələşdirilməsi də müzakirə edilib. Lakin bank bundan imtina edib.
İyunun 13-nə olan rəsmi məzənnə - 0,8189 AZN/USD.
Müəlliflə əlaqə saxlamaq üçün elektron ünvan: [email protected]
