Azərbaycan, Bakı, 17 noyabr/ Trend , müxbir Ü.İsmayılova/ Dünya Bankı (DB) Azərbaycanda dövlət əmlakının idarə edilməsi və registrinin yeni sisteminin yaradılmasına kömək edir, - Dövlət Əmlakının İdarə Edilməsi üzrə Dövlət Komitəsindən bazar ertəsi bildiriblər. Bu tədbirlər Azərbaycan hökuməti ilə birgə "Daşınmaz əmlakın qeydiyyatı" layihəsi çərçivəsində həyata keçirilir.
DB - nin missiyası Bakıdadır. Missiya Dövlət Komitəsinin mütəxəssisləri ilə Komitə üçün İKT sisteminin işlənilməsi istiqamətində müzakirələr aparıb, Komitənin regional ofislərinin təmiri ilə bağlı vəziyyətlə tanış olub və bunlar layihə çərçivəsində nəzərdə tutulur.
Bankın ekspertləri görüşdə qeyd ediblər ki, layihənin realizəsinin əsas məqsədlərindən biri dövlət əmlakının istifadəsi və idarə olunmasında səmərəliliyin təmin edilməsi, vahid, mərkəzləşdirilmiş qeydiyyat sisteminin təkmilləşdirilməsidir.
Komitənin institusional potensialının gücləndirilməsi və inzibatçılığın təkmilləşdirilməsi də nəzərdə tutulur.
Ötən həftə DB-nin ekspertləri Azərbaycanın Daşınmaz Əmlakın Dövlət Reyestri Xidmətində görüşlər keçiriblər.
Azərbaycan hökuməti və Dünya Bankı (DB) 2007- ci ilin iyulunda daşınmaz əmlakın vahid kadastrı sisteminin birgə tətbiqi haqqında saziş imzalayıblar.
Layihə dörd komponentdən ibarətdir - daşınmaz əmlakın qeydiyyatı; dövlət əmlakının idarə edilməsi və reyestri; baza xəritəçəkməsi və torpaq kadastrı; treninqlər, siyasətin və layihənin idarə edilməsinin formalaşdırılması. Layihənin dəyəri $38,57 mln.-dur və bunun $30 mln.-u DB-nin kreditinin payına düşür. Kredit ehtiyatları, 5 il güzəştli dövr olmaqla, 20 il müddətinə ayrılıb.
Müəlliflə əlaqə saxlamaq üçün elektron ünvan: [email protected]