Azərbaycan, Bakı, 19 dekabr/ Trend , müxbir Ü.İsmayılova/ "Maliyyə böhranı BE&G sığorta şirkətinin yığımlarının 30 faiz azalmasına gətirib", - şirkətin İdarə Heyətinin sədri Zaur Novruzov cümə günü bildirib.
Onun sözlərinə görə, "yığımların azalması şirkətin portfelinin təxminən 60 faizini bank müştəriləri təşkil etdiyi üçün baş verib".
Azərbaycanın əksər bankları avqustdan istehlak kreditlərinin, o cümlədən sığorta sektoru ilə sıx bağlı olan avtomobil kreditlərinin verilməsini azaldıb, bəziləri isə dayandırıblar.
Yanvar-sentyabr ərzində BE&G-in sığorta haqları 1,6 mln. manat təşkil edib. Şirkət ilin sonunadək bu göstəricini 2 mln. manatadək artırmağı planlaşdırır, - Novruzov əlavə edib.
İlin sonunadək şirkətin planlarına Nizamnamə kapitalının hazırki 800 min manatdan 1 mln. manatadək, 2009 - cu idə isə, martda qəbul edilmiş sığorta haqqında Qanuna müvafiq olaraq, daha 1 mln. manat artırılması daxildir.
1998 - ci ildən fəaliyyət göstərən BE&G şirkəti, dördü icbari olmaqla, 28 növ sığorta xidməti göstərir.
Müəlliflə əlaqə saxlamaq üçün elektron ünvan: [email protected]
