Azərbaycan, Bakı, 21 yanvar/ Trend , müxbir E.İsmayılov/
Azərbaycanın Nəqliyyat Nazirliyi yanvarın 26-27-də Ələt qəsəbəsində Bakı Beynəlxalq Dəniz Limanının layihələndirilməsinə dair tenderdə qalib olmuş Hollandiyanın Royal Haskoning şirkəti ilə müqavilə imzalamağa hazırlaşır, - Nəqliyyat Nazirliyindəki mənbə çərşənbə günü bildirib.
Şirkət ayrı-ayrılıqda dəniz və quru hissənin layihələndirilməsini aparacaq. Royal Haskoning layihənin smeta sənədləşdirməsini də hazırlamalıdır.
"Dəvət artıq göndərilib və hollandiyalılarla müqavilənin yanvarın 26 - 27 - də imzalancağı gözlənilir", - mənbə deyib.
Yeni limanın layihələndirilməsinin podratçısının müəyyən edilməsi üçün tenderdə iştiraka dəvət altı şirkətə göndərilsə də, onlardan yalnız üçü tenderdə iştirak edib.
Royal Haskoning mühəndis tikinti - layihələndirmə şirkəti Niderlanda 1881-ci ildə yaradılıb.
Əvvəllər Koreyanın GS Engineering & Construction şirkəti layihənin texniki - iqtisadi əsaslandırılması və ilkin layihə işlərinin yekunlarını başa çatdırıb və təqdim edib. Limanın tikintisinə 2009 - cu ildə başlamaq planlaşdırılır. Yeni dəniz qapılarının yaradılması üzrə bütün işləri 2015-ci ildə başa çatdırmaq nəzərdə tutulur.
Ümumilikdə, yeni multimodal dəniz limanı tikiləcək; gələcəkdə bu ərazidə loqistika mərkəzindən başqa, azad iqtisadi zonanın yaradılması planlaşdırılır.
Ələt qəsəbəsində yeni beynəlxalq dəniz limanının tikintisi üç mərhələdə həyata keçiriləcək və 2015 - ci ilə başa çatacaq. Layihənin 2008 - 2010 - cu illəri əhatə edən birinci mərhələsi iki bərə, konteynerlərin, "ro-ro" tipli gəmilərin və adi (universal) quru yük gəmilərinin qəbulu üçün üç yük körpüsünün tikintisini nəzərdə tutur. Layihənin ikinci mərhələsi 2011 - 2013 - cü illəri əhatə edir və daha üç, üçüncü mərhələ isə (2014 - 2015 - ci illər), əlavə 2 yük körpüsünün tikilməsini nəzərdə tutur. Limanın tikintisi layihəsi 400 mln. dollardan çox qiymətləndirilir.
Müəlliflə əlaqə saxlamaq üçün elektron ünvan: [email protected]