Azərbaycan, Bakı, 29 aprel / Trend , müxbir İ.Xəlilova /
Asiya İnkişaf Bankı (AİB) iyun-iyulda Azərbaycanda iqlim dəyişiklikləri ilə bağlı məsələ üzrə tədqiqatlara başlamağa hazırdır. Bu barədə AİB-in Bakıdakı nümayəndəliyindən bildiriblər.
"Bu tədqiqatlar 10 ölkəyə - Mərkəzi Asiya, Qafqaz ölkələri, həmçinin Əfqanıstan və Pakistana texniki yardım çərçivəsində aparılacaq", - deyə nümayəndəlikdən bildiriblər.
Asiya Bankı ötən həftə bu 10 ölkədə iqlim dəyişikliklərinin qiymətləndirilməsi üçün 5 mln.dollar məbləğində texniki yardımı təsdiq edib.
"Azərbaycan banka ərizə təqdim edən və bununla da ölkəsində tədqiqatlar aparlamasına razılığını təsdiq edən ilk ölkə olub və AİB ölkənin bu məsələni operativ həll etmək hazırlığını müsbət qiymətləndirərək öz missiyasını Bakıya göndərib", - deyə nümayəndəlikdən bildiriblər.
Bankın regional şöbəsinin baş mütəxəssisi Cozef Vaynştok Azərbaycana ikigünlük səfərə gəlib. O, Azərbaycanın Ekologiya və Təbii Sərvətlər Nazirliyində görüşlər keçirib. Nazirlik AİB-in texniki yardımı ilə Azərbaycanın ekoloji strategiyası çərçivəsində iqlim dəyişikliklərinin qiymətləndirilməsinin aparılmasına razılığını ifadə edib.
Missiyanın Azərbaycana səfəri başa çatıb.
Məqalə müəllifi ilə əlaqə ünvanı - [email protected]