Azərbaycan, Bakı, 02 may / Trend , müxbir İ.Xəlilova /
Azərbaycanın kommersiya bankı AG Bank-la kredit müqaviləsinin imzalanma mərasimində iştirak etmək üçün gələn həftənin əvvəlində Beynəlxalq Maliyyə Korporasiyasının (IFS) Şərqi Avropa və Mərkəzi Asiya üzrə direktoru Şahbaz Mavaddat Bakıya gəlir. Bu barədə korporasiyanın Bakı ofisindən bildiriblər.
" IFS direktoru digər rəsmi görüşləri nəzərdə tutmayıb", - İFS-dən deyiblər.
IFC AG Bank-a 15 milyon dollar həcmində subordinar kreditin ayrılmasına razılıq verib. İnvestisiyalar bankın müxtəlif istiqamətdə inkişaf etməsinə, kiçik və orta sahibkarlığın (KOS) inkişafına, bankın kapital bazasının genişlənməsinə hesablanıb.
Kredit razılaşmasının mayın 5-də imzalanması gözlənilir.
Kredit bank və maliyyə korporasiyası arasında uzunmüddətli razılaşma çərçivəsində ayrılır. IFS AG Bank-a 1998, 2003 və 2006-cı illərdə KOS və lizinq əməliyyatlarının maliyyələşdirilməsi üçün kredit ayırıb. Bununla yanaşı, 2006-cı ildə IFS AG Bank kapitalında 17,5 faizlik paya - 1,470 milyon manata sahib olub.
Hazırda AG Bank-da iki xarici səhmdar var. 2008-ci ilin mayında bank səhmlərinin 10 faizi Amerikanın "Kazimir Investment Caspian Fund" şirkətinə 8,36 milyon manata verilib.
Yeni səhmdarın daxil olması hesabına hər səhmin nominal dəyəri 10 min manat olduğu halda, bankın nizamnamə kapitalı 26,556 milyon manata kimi artıb.
AG Bank-ın əsas səhmdarları Çingiz Əsədullayev və Fərzulla Yusifovdur, eləcə də IFS və "Kazimir Investment Caspian Fund" şirkətidir. Bankın 13 filialı var.
Mayın 02-nə olan rəsmi məzənnə 0,8035 AZN/USD təşkil edir.
Məqalə müəllifi ilə əlaqə ünvanı: [email protected]