Azərbaycan, Bakı, 13 may / Trend /
"Bu ilin sonuna qədər Azərbaycan Dövlət Dəmiryolu İdarəsi (ADDİ) bütün istiqamətlərdə sərnişin biletlərinin satışını tam kompüterləşdirəcək", - çərşənbə günü ADDİ-nin mətbuat katibi Nadir Azməmmədov deyib.
"Hazırda ölkə regionlarında biletlər yalnız bir istiqamətə satılır. Buna səbəb vahid kompüter bazasının yoxluğudur, ancaq ilin sonuna qədər bu istiqamətdə bütün işlər başa çatdırılmalıdır", - Azməmmədov bildirib.
Yeddi-səkkiz gün ərzində şimal istiqamətində (Rusiyaya tərəf) stansiyalarda kompüterləşdirmə üzrə işlər başa çatdırılmalıdır. Artıq Dəvəçi, Xudat, Çarxı sərnişin stansiyalarında kompüterlər quraşdırılıb. Hazırda bu işlər Yalama stansiyasında aparılır. "Ancaq bu sistemin tətbiqindən sonra belə bilet satışı bir istiqamətdə aparılacaq. Hər iki istiqamətdə bilet satışı yalnız bütün istiqamətlərdə kompüter sisteminin tətbiqindən sonra mümkün olacaq", - Azməmmədov deyib. Kompüter sistemi ölkə regionlarını Bakının vahid mərkəzi ilə birləşdirəcək.
Hazırda regionlarda bilet satışı Bakıdan müəyyən sayda biletlərin regiona göndərilməsi yolu ilə aparılır.
Ötən il ADDİ tərəfindən 6,4 milyon nəfər sərnişin daşınıb.
Hazırda ADDİ-nin əsas yollarının uzunluğu 2950,6 kilometr, istismar olunanların uzunluğu isə 2122 kilometr təşkil edir.
