Azərbaycan, Bakı, 04 avqust / Trend , müxbir E.İsmayılov /
Birinci yarımilin yekunlarına əsasən, qlobal maliyyə böhranı ilə əlaqədar olaraq "Azərbaycan Dəmiryoları" QSC-nin yükdaşımalarının həcmi 27 faiz azalıb, bu barədə ADY-nın baş mühəndisi Nazir Qurbanov bildirib.
"Sərnişin daşınmasında ötən ilin analoji göstəricisi müşahidə olunur, lakin yükdaşınmasında ilk altı ay ərzində göstərici 27 faiz azalıb. Bunların hamısı qlobal maliyyə böhranı ilə əlaqəlidir", - deyə Qurbanov bildirib.
Belə ki, Azərbaycanın Dövlət Statistika Komitəsinin məlumatlarına əsasən, dəmiryolu ilə ötən ilin analoji dövründəki 13,8 milyon tona nisbətdə birinci yarımildə 10 milyon ton yük daşınıb.
Qurbanovun əvvəlcədən bildirdiyi kimi, QSC yükdaşınması üzrə həcmin ötən ildəki 27,4 milyon tona nisbətdə 25 milyon tona kimi azalacağını düşünür. Yükdaşınmasının həcminin azalması ilə əlaqədar olaraq QSC-nin gəlirlərinin bu il 30-40 faiz azalacağı gözlənilir.
Ötən il Azərbaycan Dəmir Yolu tərəfindən 6,4 milyon nəfər daşınıb.
2008-ci ildə ADY-nin ümumi gəliri 248,25 milyon manat təşkil edib ki, bunun da 164,2 milyon manatı yükdaşınmasının, 34,5 milyon manatı sərnişin daşımasının, qalan 50 milyon manat isə köməkçi təsərrüfatın payına düşür.
Hazırda ADY dəmir yollarının uzunluğu 2950,6, istismar yollarının uzunluğu isə 2122 kilometr təşkil edir.
Məqalə müəllifi ilə əlaqə ünvanı: [email protected]
