Azərbaycan, Bakı, 12 avqust / Trend /
Xalq Bank Azərbaycanda ipoteka kreditləşməsinin bərpasından sonra Mərkəzi Bank yanında fəaliyyət göstərən Azərbaycan İpoteka Fondunun (AİF) xətti ilə ümumi məbləği 2,5 milyon manatdan çox olan 63 ipoteka krediti verib. Bu barədə çərşənbə günü bankdan verilən məlumatda deyilir.
"Bu gün daha 43 ərizə rəsmiləşmə mərhələsindədir, - məlumatda deyilib. - AİF-lə sıx əməkdaşlıq edən bank ipoteka kreditləşməsinin həcmini genişləndirir və ərizələrin qəbulunu davam etdirir".
AİF-in şərtlərinə görə, kreditlər 8 faizlə 25 il müddətinə verilir. Kreditin ən yüksək məbləği isə 50 min manatdır. İlkin ödəniş alınacaq mənzilin dəyərinin 15 faizidir.
Güzəştli ipoteka bu şərtlərlə verilir: maksimal məbləği 35 min manat olmaqla 35 il müddətinə, illik 4 faizlə.
İpoteka kreditinin bərpası ilə əlaqədar olaraq 17 bank, 7 qiymətləndirmə və 10 sığorta şirkəti AİF-in səlahiyyətlisi kimi təsdiq olunub.
İpoteka kreditləşməsinin şərtləri bunlardır: kreditlər milli valyuta - manatla və yalnız Azərbaycan vətəndaşlarına verilir; ipotekanın obyekti yalnız mənzil və ya şəxsi ev ola bilər; ipoteka kreditləşməsinin məbləği bazar qiymətlərinin 85 faizini keçməməlidir; kredit üzrə aylıq ödəmə borc götürənin aylıq gəlirinin 70 faizini keçməməlidir; həyat sığortasının məbləği ipoteka kreditindən çox olmalıdır və s.
Güzəştli şərtlərlə kredit şəhid ailələrinin üzvlərinə, milli qəhrəmanların ailə üzvlərinə, məcburi köçkünlərə, 3 ildən çox iş təcrübəsi olan dövlət qulluqçularına, elmləri namizədi və doktorluq dərəcəsi olanlara, idman sahəsində xidməti olan şəxslərə, eləcə də minimum xidmət müddəti üç il olan hərbçilərə verilir.
Hər ailənin bir dəfə güzəştli şərtlərlə ipoteka krediti almaq hüququ var.
2005-2008-ci illərdə AİF vasitəsilə ipotekanın maliyyələşdirilməsi üçün Azərbaycanın dövlət büdcəsindən 94 milyon manatın ayrılması nəzərdə tutulub. 2009-cu il üçün dövlət büdcəsində sosial ipotekanın maliyyələşdirilməsi üçün 14 milyon manat nəzərdə tutulub. Bundan əlavə AİF 55 milyon manatlıq istiqrazlar buraxıb. Bunun 25 milyon manatı artıq yerləşdirilib.
Avqustun 12-nə olan cari məzənnə 0,8043 AZN/USD təşkil edir.
