Azərbaycan, Bakı, 19 oktyabr / Trend , müxbir N.İsmayılova/
Azərbaycan İnvestisiya Şirkəti (AİŞ) və Özəl sektorun inkişafı İslam Korporasiyası (ICD) tərəfindən təsis edilmiş Xəzər Beynəlxalq İnvestisiya Şirkəti (CIIC) bu günə Azərbaycanda iki layihəni maliyyələşdirib. "Hazırda üçüncü böyük layihənin maliyyələşdirilməsinin təsdiqi prosesi gedir", - bazat ertəsi CIIC-nin icraçı direktoru Toğrul Köçərli deyib.
Birinci layihə Samuxda 25 min ton gücündə soyurucu anbar kompleksinin tikintisini nəzərdə tutur. CIIC ilə "N.A.A. Agrotara" ASC arasında bu layihənin maliyyələşdirilməsi barədə razılıq iyunda imzalanıb. Şirkətin bu layihəyə ayırdığı investisiya 5,5 milyon manat təşkil edir.
İkinci layihə Bakının 18 kilometrliyində olan Saray qəsəbəsində 169 malikanənin tikintisini nəzərdə tutur. "CIIC bu layihənin maliyyələşdirilməsinə 6,4 milyon manat ayırıb ki, bu da layihənin ümumi dəyərinin 20 faizini təşkil edir", - Köçərli deyib.
"Proqnozlara əsasən, 2010-cu ilin avqust ayında ilk 50 malikanə təhvil veriləcək, layihənin tam təhvili isə 2011-ci ilin ilk rübündə gözlənilir", - Köçərli deyib.
Təsdiqinin son mərhələsində olan üçüncü layihə ölkənin aqrobiznes və kənd təsərrüfatı sektorunun inkişafına yönəldilib. Layihə ölkədə yeganə salat istehsalçısının maliyyələşdirilməsini nəzərdə tutur. Layihə çərçivəsində müasir tələblərə cavab verən istixanalar tikiləcək.
"CIIC layihənin 68 faizini maliyyələşdirəcək ki, bu da 1,5 milyon manat təşkil edir", - Köçərli deyib.
Caspian International Investment Company 2008-ci ilin martında 2,954 milyon manatlıq ilkin kapitalla QSC kimi qeydiyyatdan keçib. AİŞ-in iştirak payı 25, ICD-nin iştirak payı isə 75 faiz təşkil edib. Bu gün şirkətin nizamnamə kapitalı 23 milyon manat təşkil edir.
Strategiyaya əsasən, CIIC-nin sərmayəsi, şəriət prinsiplərinə zidd olan spirtli içki və donuz məhsulları istehsalı və həmçinin maliyyələşdirmə standartları və sığorta xidmətləri göstərən bank və sığorta təşkilatları istisna olmaqla, iqtisadiyyatın real sektorunda həyata keçiriləcək.
Oktyabrın 19-na olan rəsmi məzənnə 0,803 AZN/USD təşkil edir.
Məqalə müəllifi ilə əlaqə ünvanı: [email protected]