Azərbaycan, Bakı, 21 noyabr / Trend , müxbir Ü.İsmayılova/
Azərbaycanda fiziki şəxslərin avtomobil sığortası üzrə vahid sığorta qaydalarının tətbiq edilməsi sığortaçıların etibarını artıra bilər. Ölkənin ən iri sığorta şirkətlərindən biri olan MBASK-ın İdarə Heyətinin sədri Cəmil Məlikov belə hesab edir.
"Bir çox inkişaf etmiş bazarlarda bənzər vahid qaydalar olmasa da, Azərbaycanın inkişaf edən sığorta bazarı üçün bu müsbət addım olacaq", - Məlikov deyib.
"Avtomobil sığortası üzrə vahid qaydaların tətbiq edilməsi nəticəsində sığorta etdirən şəxs əmin olacaq ki, şirkət sığorta vəsiqəsində ödənilə biləcək sığorta hallarını göstərəcək, sığorta edən şirkət isə əmin olacaq ki, müştəri müqavilədə göstəriləndən daha çoxunu tələb etməyəcək", - Məlikov deyib.
Maliyyə Nazirliyinin Dövlət Sığorta Nəzarəti Şöbəsinin müdiri Namiq Xəlilovun bir müddət öncə dediyinə görə, avtomobil sığortası üzrə vahid qaydaların tətbiqinə dair təklif artıq müzakirə üçün Sığortaçılar Assosiasiyasına təqdim edilib.
Sığortaçılar Assosiasiyanın icraçı direktoru Qafar Məcidovun sözlərinə görə, sığortaçılar üçün avtomobil sığortasının vahid qaydaları assosiasiyanın hüquq komitəsində müzakirə ediləcək və yaxın iki həftə ərzində nazirliyə təqdim ediləcək.
Azərbaycanda 28 sığorta və bir təkrar sığorta şirkəti fəaliyyət göstərir. Doqquz ayın yekunlarına əsasən, şirkətlərin haqları 130,18 milyon manat, ödəmələri isə 38,22 milyon manat təşkil edib. Doqquz ay ərzində avtomobil sığortası üzrə sığortaçıların ümumi haqları 23,67 milyon manat, ödəmələri isə 12,35 milyon manat təşkil edib.
Azərbaycanın sığorta bazarında 1992-ci ildən fəaliyyət göstərən MBASK şirkəti 29 növdə sığorta xidməti göstərir ki, onlardan dördü icbari sığortadır. Şirkətin nizamnamə kapitalı 2 milyon manat təşkil edir.
Məqalə müəllifi ilə əlaqə ünvanı: [email protected]
