Azərbaycan, Bakı, 23 fevral / Trend , müxbir N.İsmayılova/
Avropa Yenidənqurma və İnkişaf Bankı (AYİB) Sumqayıtda məişət tullantılarının emalı üzrə müəssisənin inşasına dair layihənin maliyyələşdirilməsi ilə bağlı ilkin danışıqlar aparıb. Bu barədə çərşənbə axşamı AYİB-in Bakı nümayəndəliyindən məlumat verilib.
Danışıqların aparılması üçün AYİB missiyası Bakıdadır. Missiyaya AYİB-in Bələdiyyə və Ekoloji İnfrastruktur Layihələri Departamentinin bankirləri Akixiro Kudo və Henri Moykinen daxildir.
Fevralın 22-də Sumqayıt şəhər İcra Hakimiyyətinin başçısı Vaqif Əliyev AYİB nümayəndələrini qəbul edərkən bildirib ki, təmizliyə riayət olunması və ətraf mühitin qorunmasının gücləndirilməsi hər zaman şəhər üçün prioritet istiqamət olub.
Onun sözlərinə görə, Sumqayıtda çirklənmiş məişət sularının təmizlənməsi üçün sutkada 200 min kubmetr gücə malik sutəmizləyici qurğu tikilir. Həmçinin Sumqayıt elektrik stansiyasının istismara verilməsi, yüksək gərginlikli ötürücü kabelin, müxtəlif diametrli elektrik naqilinin istehsalı məqsədilə Sumqayıt texnoparkının inşası planlaşdırılır.
Əliyevin sözlərinə görə, poliqonlarda məişət tullantılarının toplanması, daşınması və yerləşdirilməsinin kompleks idarə olunması 2009-cu ildə fəaliyyətə başlamış Təmizlik Departamenti tərəfindən həyata keçirilir. Bu müddətdə sahibkarlıq subyektlərindən, eləcə də idarə, təşkilat və müəssisələrdən tullantılarla dolu 3000-dən çox konteyner alınıb və müvafiq müqavilələr imzalanıb.
Şəhərdə məişət tullantılarının toplanmasının və daşınmasının tam təminatı məqsədilə Avstriya, Fransa və Almaniyanın təcrübəsi öyrənilib və tətbiq edilir, Almaniya istehsalı olan maşın və mexanizmlərdən istifadə olunur.
Şəhər ərazisində toplanan bərk məişət tullantıları poliqonda yerləşdirilir. Əliyevin sözlərinə görə, poliqonda 10 hektar ərazi tamamilə hamarlanaraq torpaqla örtülüb, 5 hektarda isə müasir standartlara cavab verən yeni poliqon tikilir.
"Ümumilikdə, ərazidə analizlər aparılır və ərazi emal müəssisələrinin yerləşdirilməsi üçün hazırlanır",- deyə şəhər İcra Hakimiyyətinin başçısı bildirib.
Öz növbəsində qonaqlar Sumqayıtda bu sahənin inkişafında maraqlı olduqlarını bildiriblər.
