Azərbaycan, Bakı, 6 mart / Trend , muxbir N.İsmayılova/
Azərbaycan və İranın Gömrük və Sərhəd Xidməti iki ölkə arasındakı müqaviləyə əsasən fevralın 1-dən etibarən İran İslam Respublikasına səfər etmək istəyən Azərbaycan vətəndaşları üçün viza rejiminin aradan qaldırılması ilə əlaqədar olaraq baş verən problemləri müzakirə edib. Bu barədə Azərbaycanın Dövlət Gömrük Komitəsinin məlumatında deyilir.
Azərbaycan vətəndaşlarının İran ərazisində vizasız qalmaq müddəti 15 gün təşkil edir. İranın Daxili İşlər Nazirliyinə müraciət etməklə bu müddətin üç aya qədər uzadılması mümkündür.
Görüşdə hər iki tərəf vətəndaşların və yük və minik avtomobillərinin normal giriş-çıxışını təmin etmək məqsədilə baş verən problemlərin aradan qaldırılmasına dair öz təkliflərini irəli sürüb.
Azərbaycan tərəfinin irəli sürdüyü təklifə əsasən, İrana istiqamətlənmiş sərnişin avtobuslarının Azərbaycan gömrüyü vasitəsilə keçməsinin nizamlanması, sərnişinlərin vaxt itgisinin aradan qaldırılmasını, həmçinin yük maşınlarının gömrük nəzarətindən stabil keçməsinin təmin edilməsi məqsədəuyğun hesab edilib.
Görüşdə Azərbaycan və İran gömrük orqanları əməkdaşlarının saat 12:30-dan 14:00-dək fasiləsi barədə qərar qəbul edilib.