Azərbaycan, Bakı, 20 may /Trend, müxbir Ü.İsmayılova/
Azərbaycanın Sığorta Şirkəti "Əmrah Sigorta" ASC mayın 7-də dayandırılan lisenziyasının bərpası üçün artıq Maliyyə Nazirliyinə müraciət edib. Bu barədə cümə axşamı SŞ-dən məlumat verilib.
"Maliyyə Nazirliyinə rəsmi müraciət çərşənbə axşamı göndərilib", - şirkətdən bildirilib.
Mənbənin sözlərinə görə, MN şirkətdən yenidən balans tələb edib. Hazırda o hazırlanır və bu günlərdə nazirliyə təqdim olunacaq.
"Əmrah Sigorta" ASC Qiymətli Kağızlar Üzrə Dövlət Komitəsində qeydiyyata alınan1,5 milyon manat həcmində emissiya prospektinin yerləşdirilməsini başa çatdırıb. Beləliklə, şirkətin nizamnamə kapitalı tələb olunan səviyyəyə - iki milyon manata çatdırılıb.
Mayın 7-də Azərbaycan Maliyyə Nazirliyinin əmri ilə üç şirkətin - "Günay Sığorta", "Azal Sığorta" və "Əmrah Sığorta"nın sığorta fəaliyyətinin həyata keçirilməsi üzrə lisenziyası dayandırılmışdı. Belə qərar sığorta qanunvericiliyi ilə müəyyən edilmiş ödəniş qabiliyyəti və sığortaçıların maliyyə sabitliyi normativlərinin yerinə yetirilməsi üzrə dövlət sığorta nəzarəti orqanının göstərişlərinin yerinə yetirilməməsi ilə bağlıdır. Həmin şirkətlərə pozuntuların aradan qaldırılması üçün altı ay verilib, daha doğrusu, lisenziyaların fəaliyyətinin dayandırıldığı vaxtdan, onlar yeni müqavilə bağlaya bilməzlər. Lakin qüvvədə olan müqavilələr üzrə öhdəliklər yerinə yetirilməlidir.
"Sığorta fəaliyyəti haqqında" qanuna uyğun olaraq, 2010-cu il yanvarın 1-dən sığorta şirkətləri ümumi kapitalı iki milyon manatadək çatdırmalıdırlar. Bundan əvvəl, aprelin sonlarında, "Azİnvest Sigorta" ASC-yə sığorta fəaliyyəti üzrə müddətsiz lisenziyanın verilməsindən imtina edilmişdi, daha doğrusu, şirkət ölkənin sığorta bazarında öz mövcudluğuna son qoymuşdu.
"Əmrah Sığorta" 1993-cü ildə yaradılıb. Şirkət 18 sığorta xidməti göstərmək üzrə lisenziyaya malikdir. Onlardan üçü icbaridir. Şirkətin səhmdarları iki fiziki şəxsdir.