Azərbaycan, Bakı, 3 avqust /Trend, müxbir E.İsmayılov/
Azərbaycan Nəqliyyat Nazirliyi Ələt qəsəbəsində yeni limanın tikintisinə cari ilin sentyabrında başlamağı planlaşdırıb. Bu barədə çərşənbə günü nəqliyyat nazirinin müavini Musa Pənahov deyib.
"Tikinti işlərinin sentyabrın əvvəlində başlanacağı güman edilir", - nazir müavini bildirib.
Bu liman multimodal olacaq, belə ki, logistik mərkəzlə yanaşı, gələcəkdə bu ərazidə azad iqtisadi zonanın yaradılması planlaşdırılıb.
Ələt qəsəbəsində yeni beynəlxalq dəniz limanının tikintisi üç mərhələdə həyata keçiriləcək və 2015-ci ildə başa çatacaq. Layihənin 2008-2010-cu illəri əhatə edən birinci mərhələsində konteynerlərin, "ro-ro" tipli gəmilərin və adi (universal) quru yüklərin qəbulu üçün iki bərə, üç yük körpülərinin inşası nəzərdə tutulur. 2011-2013-cü illəri əhatə edən ikinci mərhələdə daha üç yük körpülərinin inşası, üçüncü mərhələdə isə (2014-2015) iki əlavə yük körpüsünün inşası nəzərdə tutulur. Limanın inşası layihəsi 400 milyon dollardan çox qiymətləndirilir.
Liman 11,6 milyon tonadək yük qəbul etmək iqtidarında olacaq.
Hazırda Xəzər dənizində cəmi altı beynəlxalq ticarət limanı fəaliyyət göstərir. Bunlar Bakı (Azərbaycan), Türkmənbaşı (Türkmənistan), Aktau (Qazaxıstan), Həştərxan (Rusiya), Ənzəli və Nekadır (İran).
