Azərbaycan, Bakı, 27 oktyabr /Trend, müxbir N.İsmayılova/
Çexiya Azərbaycanı vacib, perspektivli və etibarlı tərəfdaş hesab edir və Azərbaycana Çexiya ixracının həcminin artırılmasına ümid edir. Bu barədə çərşənbə günü Çexiyanın Azərbaycandakı səfiri Radek Matula Bakıda Azərbaycan-Çexiya biznes-forumunda çıxış edərkən deyib.
"Çex şirkətləri Azərbaycanla əməkdaşlıq etməyə maraq göstərir və onların nəqliyyat, tikinti, Azərbaycan zavodları üçün avadanlıq nəqli kimi sahələrdə əməkdaşlığın qurulması üçün təklifləri var", - Matula deyib.
Onun sözlərinə görə, Çexiya, həmçinin, Azərbaycanla ətraf mühitin mühafizəsi, çirkab suların təmizlənməsi kimi sahələrdə də əməkdaşlığa hazırdır.
"Çexiya Azərbaycan şirkətlərinin Çexiyada avtomobilqayırma və texnologiya sahəsində investisiyalaşdırmasına dəstək üçün yaxşı imkanlara malikdir", - səfir deyib.
Matulanın sözlərinə görə, ölkələr arasında mal mübadiləsinin ən böyük həcmi 2008-ci ildə 1,12 milyard avro həcmində müşahidə olunub; 2009-cu il böhran dövründə 548 milyon avroya enib, lakin 2010-cu ildə artım müşahidə edilib.
"Cari ilin səkkiz ayı ərzində ölkələr arasında mal mübadiləsi ötən ilin analoji dövrünə nisbətdə 127 faiz artaraq 64 milyon avro təşkil edib", - səfir deyib.