Azərbaycan, Bakı, 12 yanvar /Trend, müxbir A.Axundov/
Türkiyə Azərbaycan ilə azad iqtisadi zonanın yaradılmasında maraqlıdır. Bu barədə Trend-ə çərşənbə günü Türkiyənin Xarici Ticarət üzrə Katibliyi yanında azad iqtisadi zonalar şöbəsinin direktor müavini Nəcmi Uğurlu deyib.
Onun sözlərinə görə, Azərbaycandan hələ ki azad iqtisadi zonanın yaradılması ilə bağlı müraciət daxil olmayıb.
"Müvafiq müraciətin daxil olacağı təqdirdə, biz azad iqtisadi zonanın yaradılması üzərində işə başlayacağıq. Bu məsələ İranla olduğu kimi, o qədər də problemli deyil", - Uğulu bildirib.
Onun sözlərinə görə, Türkiyə qanunvericiliyinə əsasən azad iqtisadi zonada işləyən sahibkarlar üçün ciddi vergi güzəştləri var.
"Onlar gömrük rüsumlarının və ƏDV-nin ödənilməsindən azad edilirlər. Bütün digər vergilər üzrə dərəcələr azaldılır. Öz istehsalatını bilavasitə azad iqtisadi zonada qurana və ora investisiya yatırana böyük güzəştlər edilir", - Uğurlu bildirib.