Azərbaycan, Bakı, 28 yanvar /Trend, müxbir A.Bədəlova/
2010-cu ildə Azərbaycanın iri lizinq şirkəti olan "Joint Leasing" məcmu kapitalını və lizinq portfelini, eləcə də lizinq avadanlıqlarının həcmini artırıb ki, bunun nəticəsində 2009-cu illə müqayisədə daha çox mənfəət əldə edib. Bu barədə şirkətin cümə günü yaydığı məlumatda deyilir.
2011-ci ilin əvvəlinə "Joint Leasing"in lizinq portfeli 28,81 milyon manat təşkil edib ki, bu da 2010-cu ilin əvvəlində olan məbləğdən 210 min manat çoxdur. Göstərilən dövr ərzində şirkətin məcmu kapitalı 2,168 milyon manat artaraq 3,437 milyon manata çatıb. Məcmu kapitalın illik artımı 1,269 milyon manat (58,5 faiz) təşkil edib.
2010-cu ildə şirkət 36 yeni lizinq müqaviləsi imzalayıb ki, bunun nəticəsində 2011-ci ilin əvvəlinə şirkətin imzaladığı müqavilələrin ümumi sayı 185 ədəd təşkil edib. "Joint Leasing" şirkətinin maliyyələşdirdiyi layihələr iqtisadiyyatın tikinti, nəqliyyat, qida və yüngül sənaye, ticarət və xidmət kimi sahələrini əhatə edir.
2011-ci il yanvarın 1-nə olan vəziyyətə görə, şirkət 3 milyon 231 min manat məbləğində texnika və avadanlıqların alınmasını maliyyələşdirib ki, bu da ötən ilin analoji dövrünün göstəricisindən 788 min manat (32,6 faiz) çoxdur. Maliyyələşdirmənin ümumi həcmindən 95 faizə yaxın biznes layihələrinin, 5 faizi isə istehlak xarakterli layihələrin payına düşür.
2010-cu il ərzində şirkətin mənfəəti 1 milyon 632 min manat təşkil edib ki, 2009-cu ildə əldə olunan mənfəətdən 232 min manat (16,6 faiz) çoxdur.
"Joint Leasing Company" 2007-ci il iyunun 14-dən "Azərlizing" şirkətinin hüquqi varisi kimi fəaliyyət göstərir. Şirkətin təsisçiləri Britaniyanın "Dolphin Leasing" şirkəti (52,3 faiz) və Azərbaycan Beynəlxalq Bankıdır. Hazırda şirkətin nizamnamə kapitalı 700 min manat təşkil edir.
Yanvarın 28-nə rəsmi məzənnə 0,7969 AZN/USD təşkil edir.