Azərbaycan, Bakı, 21 aprel /Trend, müxbir A.Axundov/
Yanvar-mart ayları ərzində Azərbaycanda tikinti işlərinin həcmi 2010-cu ilin analoji dövrü ilə müqayisədə 12,9 faiz artıb. Bu barədə Azərbaycan Dövlət Statistika Komitəsindən Trend-ə verilən məlumatda deyilir.
Tikinti işlərinin ümumi həcminin 71,8 faizi ilkin tikinti, yenidənqurma və genişləndirmə, 19,1 faizi əsaslı təmir, 4 faizi cari təmir, 5,1 faizi isə digər tikinti işlərinin payına düşür.
Dövlət və özəl şirkətlər tərəfindən həyata keçirilən tikinti işlərinin həcmi ümumi işin müvafiq olaraq 29,7 və 70,3 faizini təşkil edib.
2011-ci ilin birinci rübündə tikinti sektorunda işləyən 66,4 min nəfərin orta aylıq nominal əməkhaqqısı 510,3 manat təşkil edib. Bu, 2010-cu ildəkindən 6,5 faiz çoxdur. Bu zaman dövlət şirkətlərində çalışanların əməkhaqqısı 352,9 manat (il ərzində 2,6 faizlik artımla), özəl şirkətlərdə isə 643,1 manat (4,8 faizlik artımla) təşkil edib.
Böyük və orta tikinti şirkətlərində əməkhaqqının nominal səviyyəsi 535,3 manat təşkil edib. İl ərzində yaşayış binalarının tikintisi sahəsində əməkhaqqı ötən ilin analoji dövrünə nisbətdə 11 faiz artaraq 543,9 manata, mülki təyinatlı tikinti işləri üzrə 19,4 faiz artaraq 344,4 manata, xüsusiləşdirilmiş tikinti işləri üzrə 5,6 faiz artaraq 580,3 manata çatıb.
Aprelin 21-nə olan məzənnə 0,7917 AZN/USD təşkil edir.
