Azərbaycan, Bakı, 5 may /Trend, müxbir A.Axundov/
Azərbaycan Prezidenti İlham Əliyev tərəfindən təsdiqlənən "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı" çərçivəsində tədbirlər planı paytaxtda və onun iki qəsəbəsində iki su anbarının tikintisini və iki mövcud su anbarının yenidən qurulmasını, eləcə də, su anbarları arasında birləşdirici xətlərin çəkilişini nəzərdə tutur.
Dövlət Proqramı habelə, 2011-2013-cü illərdə Ceyranbatan su anbarındakı sutəmizləyici qurğuların səmərəliliyinin artırılması məqsədilə Ceyranbatan-Maştağa su kəmərinin qəza vəziyyətində olan hissəsinin dəyişdirilməsini və Ceyranbatan-Maştağa yeni su kəmərinin tikintisini nəzərdə tutur.
Bundan əlavə, göstərilən dövrdə avtomobil yollarında aparılan bərpa işləri ilə əlaqədar su və kanalizasiya sistemlərinin yenidən qurulması, eləcə də çirkab sularının şəhərin qərb hissəsində yaradılan Lökbatan təmizləyici qurğusuna yönəldilməsi üçün kanalizasiya kollektorunun tikintisi də planlaşdırılır.
2011-2012-ci illərdə kanalizasiya nasos stansiyalarının yenidən qurulması, istismar müddəti başa çatmış kanalizasiya nasos stansiyalarının yeniləri ilə əvəz edilməsi, "Sənaye zonası" kollektorunun kamera və dyukerlərinin bərpası nəzərdə tutulub.
Dövlət Proqramına görə, Bakının və onun qəsəbələrinin su təchizatının yaxşılaşdırılması üzrə işləri Azərbaycanın su operatoru olan "Azərsu" ASC dövlət şirkəti yerinə yetirəcək.
Dövlət Proqramında, həmçinin Abşeron yarımadasında kənd təsərrüfatı üçün yararlı topraqların suvarılması ilə bağlı vəziyyətin yaxşılaşdırılması, eləcə də suburaxma qabiliyyətinin artırılması üçün Abşeron magistral kanalının yenidən qurulması üzrə işlərin görülməsi də nəzərdə tutulub. Həmin işləri "Meliorasiya və Su Təsərrüfatı " ASC yerinə yetirəcək.