Azərbaycan, Bakı, 5 avqust /Trend, müxbir N.İsmayılova/
Dünya Bankı 2012-ci maliyyə ili ərzində Azərbaycanda 4 layihənin həyata keçirilməsi üçün maliyyələşdirməni təsdiq etməyi planlaşdırır. Trend-in məlumatına görə, bu barədə cümə günü jurnalistlərlə görüşdə DB-nin ölkədəki nümayəndəliyinin rəhbəri Cozef Ouen deyib.
"Biz artıq bu 4 layihəni bankın Direktorlar Şurasına təqdim etməyə hazırıq. Onların sırasında "Məcburi köçkünlərin iqtisadi inkişafına yardım" layihəsi, Hövsan aerasiya stansiyasından kanalizasiya sularının Xəzər dənizinə axıdılması üzrə tikinti layihəsi, "Azərbaycanın kənd investisiyaları" (AzRIP) layihəsinin və kənd təsərrüfatının inkişafı və kreditləşməsi üzrə proqramın III fazasının həyata keçirilməsi çərçivəsində fəaliyyət var", - Ouen bildirib.
Onun sözlərinə görə, AzRIP layihəsinin həyata keçirilməsinə bank 30 milyondan 50 milyon dollaradək, bir o qədər də kənd təsərrüfatının inkişafı və kreditləşməsi üzrə proqramın həyata keçirilməsinə və təxminən 80-90 milyon dollar Hövsan aerasiya stansiyasından kanalizasiya sularının Xəzər dənizinə axıdılması üzrə tikinti layihəsinin həyata keçirilməsinə verməyi planlaşdırır.
"Məcburi köçkünlərin iqtisadi inkişafına yardım" layihəsi (IDP EDSP) üçün yeni kredit 50 milyon dollar təşkil edir.
Layihənin ümumi dəyəri 74,5 milyon dollar qiymətləndirilir. Azərbaycan hökuməti layihənin dəyərinin 25 faizini və vergilərin ödənilməsi (ƏDV) üzrə xərcləri maliyyələşdirəcək.
Əvvəllər məlumat verildiyi kimi, Hövsan aerasiya stansiyasından kanalizasiya sularının Xəzər dənizinə axıdılması üzrə tikinti layihəsinin ilkin dəyəri 109 milyon dollar təşkil edir. Bu məbləğin 92 milyonu Beynəlxalq Yenidənqurma və İnkişaf Bankının (DB-nin qrupuna daxildir) xəttindən ayrılacaq.
AzRIP layihəsinin həyata keçirilməsinə dair kredit müqaviləsi 2004-cü il sentyabrın 23-də imzalanıb və 2004-cü il dekabrın 29-da qüvvəyə minib. Layihənin ümumi dəyəri 21,1 milyon dollar təşkil edir ki, bunun da 15 milyon dolları Beynəlxalq İnkişaf Assosiasiyasının, 3,3 milyon dolları Yaponiya hökumətinin qrantının payına, qalan hissəsi isə hökumətin payına (1,250 milyon dollar) düşür. 2010-cu ilin aprelində AzRIP layihəsinin ümumi məbləği 21,5 milyon dollar olan əlavə maliyyələşdirilməsi üzrə kredit sazişi imzalanıb.
Hazırda Azərbaycanda kənd təsərrüfatının inkişafı və kreditləşməsi proqramının ikinci mərhələsi davam edir. Layihə üzrə kredit sazişi 2006-cı ilin payızında imzalanıb. Bu layihənin həyata keçirilməsi fermerlərin gəlirlərinin və kənd təsərrüfatı müəssisələrinin səmərəliliyinin artmasına xidmət edir. Layihə 2007-ci ildən həyata keçirilməyə başlayıb. O, 4 il üçün nəzərdə tutulub.
Layihənin ümumi dəyəri 58 mln. dollar təşkil edir, Dünya Bankının kreditinin payına 30 mln. dollar düşür. Beynəlxalq İnkişaf Assosiasiyasının (BİA) vəsaitlərindən 20,5 milyon dollar, 8 milyon dollar BİA şərtlərinin sərtləşdirilməsi üçün ayrılıb. Bu da 35 il müddətinə ödənişi 10 il güzəştli olmaqla, libor-2 faiz dərəcəsi ilə hesablanıb.
Bankın Azərbaycandakı indiki portfeli ümumi dəyəri 2,3 milyard dollar olan 20 layihədən ibarətdir. Azərbaycan 1992-ci ildən DB ilə əməkdaşlıq edir və əməkdaşlıq çərçivəsində bank hazırda 43 layihənin maliyyələşdirilməsinə 2,9 milyard dollar ayırıb, bu isə Türkiyə və Qazaxıstandan sonra ölkəni portfelin həcminə görə üçüncü yerə qoyur.
