Azərbaycan, Bakı, 16 mart /Trend, müxbir Ə.Həsənov/
2012-ci ilin yanvar-fevral aylarında Azərbaycan iqtisadiyyatına qoyulmuş xarici investisiyaların ümumi həcmi 398,1 milyon manat təşkil edib ki, bu da ötən ilin analoji dövr göstəricisindən 23,6 faiz çoxdur. Trend-in məlumatına görə, bu barədə cümə günü Dövlət Statistika Komitəsinin hesabatında deyilir.
Yanvar-fevral aylarında xarici dövlətlər və beynəlxalq təşkilatların Azərbaycan iqtisadiyyatına qoyduğu investisiyaların 89,7 faizi (357,1 milyon manat) Böyük Britaniya, ABŞ, Yaponiya, Norveç, Türkiyə və Çexiyanın payına düşüb.
Əvvəlki kimi Böyük Briyaniya liderlik mövqeyini qoruyur. Onun xarici investisiyaların ümumi həcmində xüsusi çəkisi 44,7 faiz, investisiyaların özü isə 177,9 milyon manat təşkil edib.
ABŞ investisiyaları 68,57 milyon manat (17,2 faiz xüsusi çəki), Yaponiya - 45,48 milyon manat (11,4 faiz), Norveç - 25,17 milyon manat (6,3 faiz), Çexiya - 20,04 milyon manat (5,1 faiz), Türkiyə - 19,9 milyon manat (5 faiz), Fransa - 9,2 milyon manat (2,3 faiz), İtaliya - 63 min manat təşkil edib.
Beynəlxalq maliyyə institutlarından ən böyük maliyyə həcmini (4,4 faiz xüsusi çəkidə 17,47 milyon manat) Dünya Bankı ayırıb.
Asiya İnkişaf Bankı Azərbaycanda layihələrin həyata keçirilməsinə 13,26 milyon manat (3,3 faiz) ayırıb.
