Azərbaycan, Bakı, 12 sentyabr /Trend, müxbir Ə.Həsənov/
2012-ci ilin yanvar-iyun aylarında xarici dövlətlərlə Azərbaycanın iqtisadi əlaqələrində qarşılıqlı xidmətlər əsas yerlərdən birini tutub və bu xidmətlərin ümumi həcmi 5.3 mlrd. dollar təşkil edib. Trend-in məlumatına görə, bu barədə Azərbaycan Mərkəzi Bankının yaydığı 2012-ci ilin yanvar-iyun ayları üçün ölkənin tədiyə balansında deyilir.
Bunun 3.5 mlrd. dolları qeyri-rezidentlər tərəfindən Azərbaycanın rezidentlərinə, 1.8 mlrd. dolları isə Azərbaycan rezidentləri tərəfindən xarici ölkələrin rezidentlərinə göstərilən xidmətlərdir.
Qarşılıqlı xidmətlər dövriyyəsinin 16.2%-i nəqliyyat xidmətləri üzrə aparılan əməliyyatların payına düşür. Ümumi dəyəri 857.8 mln. dollar olan nəqliyyat xidmətlərinin 62.4%-i Azərbaycan rezidentlərinin xarici dövlətlərin nəqliyyat sistemlərindən istifadə etmələri ilə əlaqədardır. Azərbaycan rezidentlərinin qeyri-rezidentlərə göstərdikləri nəqliyyat xidmətlərinin ümumi dəyəri isə 322.7 mln. dollar təşkil edib.
Hesabat dövründə xarici ölkə vətəndaşlarına turizmlə bağlı göstərilən xidmətlərin dəyəri 1.0 mlrd. dollar məbləğində qiymətləndirilib. Bunun 40%-i qeyri-rezidentlərin Azərbaycana işgüzar səfərləri ilə bağlıdır.
Öz növbəsində, xarici ölkələr tərəfindən Azərbaycan rezidentlərinə turizmlə bağlı göstərilən xidmətlərin dəyəri əvvəlki ilin müvafiq dövrünə nisbətən 1.7 dəfə artaraq 1.2 mlrd. dollar məbləğində olub. Bunun 63.2%-i Azərbaycan vətəndaşlarının şəxsi səfərləri ilə bağlı xarici ölkələrdə olarkən sərf etdikləri vəsaitlərin (məkik idxal üçün vəsaitlər istisna olmaqla) payına düşür.
Ümumiyyətlə, qarşılıqlı xidmətlərin ölkənin xarici dövlətlərlə əmtəə və xidmətlər üzrə ümumi idxal-ixrac dövriyyəsində xüsusi çəkisi 19.3% təşkil edib.