Azərbaycan, Bakı, 18 sentyabr /Trend, müxbir A.Tağıyeva/
Azərbaycanda iqtisadi inkişafın sürətli templəri sayəsində Türkiyə banklarının ölkənin bank bazarına marağı artır. Bu barədə çərşənbə axşamı Trend-ə "Yapi Kredi Azerbaijan" bankının baş direktoru Coşqun Bulak bildirib.
"Türkiyənin "Yapi Kredi" bankı Azərbaycanda özünün törəmə bankını açanda, biz yüz faizlik Türkiyə kapitalı ilə çalışan yeganə bank idik. Bu gün Azərbaycan bazarında Türkiyə kapitallı başqa banklar da fəaliyyət göstərir", - o deyib.
Onun sözlərinə görə, Azərbaycanın bank sektoru etibarlı və sabit inkişaf edir ki, bu da ölkəni həm xarici, həm də Türkiyə bankları üçün cəlbedici edir.
Bundan əvvəl Türkiyənin "İş Bankası" Azərbaycan Mərkəzi Bankına ölkədə filialının yaradılması ilə bağlı müraciət ünvanlayıb və bu məqsədlə artıq Türkiyə banklarının fəaliyyətinə nəzarət və tənizmləmə orqanına müraciət edib.
Azərbaycan Mərkəzi Bankının 2014-cü il yanvarın 1-dən fəaliyyətdə olan bankların kapitallaşmasına minimal tələblərin 50 milyon manatadək artırılması məsələsinə toxunun Bulak deyib ki, bu gün "Yapi Kredi Azerbaijan"ın nizamnamə kapitalı 78 milyon manat təşkil edir. Ona görə də bankın bu tələbin yerinə yetirilməsi ilə bağlı problemi yoxdur.
Onun sözlərinə görə, bank Azərbaycanda filial şəbəkəsini bir neçə il ərzində 40 filialadək genişləndirməyi planlaşdırır.
"Biz ilin sonunadək filialların sayını 14-ə, ola bilsin ki, hazırkı 12-dən 15-ə çatdırmağı planlaşdırırıq. Onlardan ikisi Gəncədə və Sumqayıtda açılacaq", - Bulak deyib.
O, həmçinin qeyd edib ki, bu gün bank Azərbaycanın digər bankları ilə aktiv əməkdaşlıq edir. Lakin bank mənzil maliyyələşdirilməsinin inkişafına dair planlara malik deyil.
"İpoteka kreditləşməsi üçün uzunmüddətli resurslar vacibdir, çünki mənzil alınması üzrə kreditlər maksimum 8-10 il müddətinə verilir. Biz belə uzun müddətə kredit vermirik, ona görə də "Yapi Kredi Azerbaijan" ipoteka kreditləşməsi məsələsində o qədər də aktiv deyil", - Bulak deyib.
1998-ci ildə əsası qoyulan "Yapi Kredi Bank Azerbaijan" Türkiyənin "Yapı Kredi Bankası"nın törəmə strukturudur.
