Azərbaycan, Bakı, 6 oktyabr /Trend, müxbir A.Axundov /
Özəl sektorun inkişafı İslam Korporasiyası (ICD, İslam İnkişaf Bankı qrupuna daxildir) tərəfindən yaradılan Azərbaycanın "Ansar Leasing" lizinq şirkəti "sukuk" islam istiqrazlarının buraxılışına hazırlaşır.
Bu barədə şənbə günü Trend-ə şirkətin baş direktoru Ceyhun Nağıyev bildirib.
"Biz "sukuk" buraxmaq və onları yerli bazarda yerləşdirmək istəyirik. Beş milyon dollardan başlayacağıq, gəlirlilik 9-10 faiz səviyyəsində olacaq", -Nağıyev deyib.
Onun sözlərinə görə, şirkət xaricdə, Fars körfəzi ölkələrində islam istiqrazları emissiyasına baxacaq.
"Biz ilkin olaraq bir neçə investorla danışmışıq, onlar artıq bizim islam bondlarını almağa hazırdırlar. İndi biz həmin qiymətli kağızların formatına baxacağıq. Onlar həm yerli qanunvericiliyin, həm də islam şəriətinin tələblərinə cavab verməlidirlər", - Nağıyev bildirib.
