Bakıda "Aqua-Therm Baku-2012" beynəlxalq sərgisi keçiriləcək
Azərbaycan, Bakı, 16 oktyabr /Trend/
Oktyabr ayının 17-dən 20-dək Azərbaycan paytaxtında yerləşən "Bakı Ekspo" kompleksində "Aqua-Therm Baku-2012" 4-cü Beynəlxalq İstilik, Havalandırma və Kondisiyalaşdırma sistemləri, Su təchizatı, Sanitariya, Ətraf Mühitin Mühafizəsi Texnologiyaları, Üzgüçülük hovuzu və Bərpa Olunan Enerji Sərgisi keçiriləcək.
Həyata keçirildiyi 4 il ərzində "Aqua-Therm Baku" sərgisi təkcə Azərbaycanda deyil, həm də Xəzəryanı regionda istilik, su təchizatı, santexnika avadanlığı, havalandırma, kondisiyalaşdırma, hovuzlar, saunalar və spa üçün avadanlıqlar (HVAC) sahəsində regionun ən böyük və aparıcı tədbiri kimi öz mövqeyini qoruyub saxlaya bilib. Bu sərgiyə marağın səbəbi onunla izah olunur ki, məhz burada tərəfdaşlar və potensial sifarişçilərlə ünsiyyət saxlamaq, öz məhsul və xidmətlərini hər il bu tədbiri ziyarət edən 10.000-dən çox mütəxəssisə nümayiş etdirmək mümkündür. Tədbirin təşkilatçıları "Iteca Caspian" və "Fin-mark Srl." şirkətləri, eləcə də "ITE Group plc." şirkəti və onun tərəfdaşları - beynəlxalq şirkətləri Azərbaycan sərgisində iştiraka fəal surətdə cəlb edən "EUF" (Türkiyə), "GIMA" (Almaniya), "ITE Gulf" (BƏƏ) və "ITE China" (Çin) şirkətləridir.
Bu il "Aqua-Therm Baku" sərgisi "Bakı Ekspo" mərkəzinin ikinci və dördüncü zalında təşkil olunacaq və Azərbaycan, İran, İtaliya, Rusiya, Türkiyə və Çinin 78 şirkətini, habelə Belçika, Finlandiya, İsveç, Yaponiya və digər ölkələrdən olan istehsalçı şirkətlərin yerli nümayəndəliklərini öz meydançasında bir yerə toplayacaq. Sərgidə ilk dəfə çıxış edən debütantların sayı da artıb və iştirakçıların ümumi sayının 30%-ni təşkil edir. Sevindirici haldır ki, sərgi ekspozisiyasının üçdə birini yerli şirkətlər təşkil edir və onların arasında sərginin daimi iştirakçıları - "Metak", "Sauna Inshaat", "Yusiko", "NJT", "Euroclima", "Nenzi-M" və digər şirkətlər var.
"Aqua-Therm Baku-2012" sərgisinin fərqləndirici xüsusiyyəti ondan ibarətdir ki, bu il iştirakçılar ötən il keçirilmiş sərgi ilə müqayisədə öz ekspozisiya sahələrini xeyli artırıblar və beləliklə, sərginin ümumi sahəsi ötən ilə nisbətən 10% artıb.
"Aqua-Therm Baku" sərgisinin daha bir fərqli cəhəti sərgidə təqdim olunan məhsul və xidmətlər çeşidinin artmasıdır. Belə ki, sərgidə ənənəvi istilik sistemləri, izolyasiya materialları, saunalar, ventilyatorlar, havapaylayıcı qurğular və s. bu kimi məhsullarla yanaşı, ilk dəfə olaraq eksklüziv kaminlər, "hava pərdələri", hovuzlar üçün duzlu suda işləyən avadanlıqlar və bir sıra digər eksponatlar təqdim olunacaq. Sərginin "Ventilyasiya və kondisiyalaşdırma" bölümündə "Carrier" (ABŞ), "Daikin" (Yaponiya), "Systemair" (İsveç), "Hitachi" (Yaponiya), "Sanyo" (Yaponiya) və "Thermona" (Çexiya) kimi dünya brendləri təqdim olunacaq. İstilik sahəsində isə "Robello" və "Immergas" (İtaliya) brendləri və s. təqdim olunur. Sərgidə iştirak edən və bu avadanlıqların istismarı üzrə ixtisaslaşan mütəxəssislər onun təhlükəsiz və səmərəli istismarı haqqında suallara ətraflı şəkildə cavab verəcəklər.
"Aqua-Therm Baku-2012" sərgisini zəngin işgüzar proqram müşayiət edəcək. Belə ki, 18 və 19 oktyabr tarixlərində "Bakı Ekspo" mərkəzində bu sahənin peşəkarları "DANFOSS" şirkətinin təmsilçiləri tərəfindən hazırlanan "Danfoss" enerjiyə qənaət avadanlığı" mövzusunda və "Ekolayn" ASC təmsilçilərinin iştirakı ilə "Ekolayn" ASC-nin istehsalı olan avadanlıqlar - həll variantları və innovasiyalar" mövzusunda seminarlarda iştirak etmək üçün unikal imkan əldə edəcəklər. Seminarların mövzuları, məruzəçiləri və qrafiki haqqında ətraflı məlumatla sərginin www.aquathermbaku.az veb saytında və "Facebook" şəbəkəsindəki səhifəsində tanış olmaq mümkündür.
Sərginin ildə bir dəfə keçirilməsinə baxmayaraq, dörd gün ərzində inşaat və HVAC sahələrinin peşəkarları burada ən dolğun vaxt keçirmək imkanı əldə edirlər. Sərgidə mütəxəssislər aparıcı şirkətlərin eksklüziv təklifləri ilə tanış olur, bu sahədəki innovasiyalar haqqında məlumat toplayır və danışıqlar aparır, eləcə də Xəzər və Qafqaz bazarlarında biznesin təşviqi üçün sərgi məkanından istifadə edirlər. Beləliklə, sərgi qarşılıqlı əlaqələrin özünəməxsus katalizatoru kimi, Azərbaycanlı və xarici sahibkarlar arasında tərəfdaşlığın genişləndirilməsinə xidmət edir.
