Azərbaycan, Bakı, 13 noyabr /Trend, müxbir A.Axundov/
2013-2016-cı illər ərzində bütün maliyyə mənbələrindən əsas kapitala yönəldiləcək vəsaitin 71,8 milyard manat olacağı proqnozlaşdırılır. Trend-in məlumatına görə, bu barədə çərşənbə axşamı iqtisadi inkişaf naziri Şahin Mustafayev Milli Məclisdə 2013-cü il və növbəti 3 il üçün dövlət büdcəsi haqqında qanun layihəsinin müzakirəsi zamanı deyib.
"Bütövlükdə, bu illər ərzində Dövlət İnvestisiya Proqramı çərçivəsində ölkə iqtisadiyyatına 32,7 milyard manat vəsait qoyulacağı proqnozlaşdırılır. İnfrastruktur layihələrinə 21 milyard manat, nəqliyyat layihələrinə isə 8,7 milyard manat yönəldiləcək", - Mustafayev bildirib.
Onun sözlərinə görə, kommunal infrastruktur layihələrinə 4,8 milyard manat ayrılacaq. Bununla da respublikanın şəhər və rayonlarının qazlaşdırılması başa çatacaq, şəhər və rayon mərkəzlərinin su təchizatı və kanalizasiya sistemləri, istilik xətləri və qazanxanaları yenidən qurulacaq. Həmçinin, su ehtiyatları və irriqasiya layihələrinə 1,5 milyard manat ayrılacaq.
"Bu dövrdə energetika və sənaye layihələrinin ümumi dəyəri 5,7 milyard manat təşkil edəcək. Eləcə də sosial yönümlü layihələrə 5,1 milyard manat vəsait ayrılması proqnozlaşdırılır", - nazir deyib.
2013-cü ildə investisiya qoyuluşlarının 17,3% artaraq 18 milyard manat, növbəti 3 ildə isə 53,8 milyard manat olacağı, o cümlədən, xarici investisiyaların gələn il 5,2 milyard manat olmaqla növbəti 3 ildə 16,2 milyard manat təşkil edəcəyi proqnozlaşdırılır. Gələn il neft sektoruna 5,5 milyard, qeyri-neft sektoruna isə 12,5 milyard manat investisiya yatırılacağı gözlənilir.