Azərbaycan, Bakı, 3 dekabr /Trend, müxbir A.Axundov/
Vergilər Nazirliyi elektron auditin işi üçün xüsusi struktur yaradır. Bu barədə bazar ertəsi Trend-ə vergilər nazirinin müavini Sahib Ələkbərov bildirib.
"Yaxın vaxtlarda nazirliyin strukturunda dəyişikliklər etmək niyyətindəyik. Bu, tərkibində IT mütəxəssislərin və vergi işçilərinin yer alacağı güclü struktur olacaq. Elektron auditi həyata keçirməyimiz üçün bu struktur gələn ilin əvvəlində işə başlayacaq", - Ələkbərov qeyd edib.
Onun sözlərinə görə, elektron auditin tətbiqi üzrə layihə artıq yekunlaşma mərhələsindədir.
"Nazirliyin mütəxəssisləri xüsusi treninqlər keçiblər. Altı komponentdən (normativ-hüquqi baza, informasiya bazasının yaradılması, kadrların hazırlanması və s.) ibarət layihə başa çatmaq üzrədir", - Ələkbərov vurğulayıb.
