Azərbaycan, Bakı, 13 mart /Trend, müxbir H.Vəliyev/
Azərbaycan 2013-cü ildə daxili istehsal hesabına taxıla olan tələbatını tam ödəməyi planlaşdırır. Trend-in məlumatına görə, bu barədə çərşənbə günü jurnalistlərə kənd təsərrüfatı nazirinin müavini Bəhram Əliyev bildirib.
"Bu gün Azərbaycanda 2,8 milyon ton taxıl istehsal olunub, bu məhsula illik tələbat isə 3 milyon tondur", - nazir müavini deyib.
Onun sözlərinə görə, müvafiq olaraq, qalan 200-300 min ton idxal hesabına təmin olunmalıdır.
"Təlabatı təmin etmək üçün lazım olan taxıl həcmi artıq Azərbaycana gətirilib. Azərbaycan taxılı Qazaxıstandan alır", - Əliyev qeyd edib.
Nazir müavini bildirib ki, 2013-cü ildə artıq əkin işləri yekunlaşıb. "Güman edirəm ki, heç bir problem olmayacaq və bu il özümüzü taxılla tam şəkildə təmin etməyi planlaşdırırıq", - Əliyev deyib.
2013-cü il üçün proqnozlara görə, 965 min hektar ərazidə taxıl məhsulları (700 min hektar - buğda, 250 min hektar - arpa və digər taxıl məhsulları) əkiləcək.
