Azərbaycan, Bakı, 14 iyun /Trend, müxbir A.Axundov/
Azərbaycanda həyat sığortası ilə məşğul olan "Paşa Həyat", "Atəşgah Həyat" və "Qala Həyat" şirkətləri 2013-ci ilin yanvar-may aylarında həyat sığortasının bütün növləri üzrə 32,87 milyon manat toplayıblar ki, bu da ötən ilin analoji dövr göstəricisini 60 faiz üstələyir. Trend-in məlumatına görə, bu barədə Maliyyə Nazirliyi yanında Dövlət Sığorta Nəzarəti Xidmətinin 2013-ci ilin yanvar-may aylarında sığorta şirkətlərinin fəaliyyəti haqqında hesabatında deyilir.
Bununla yanaşı, şirkətlərin yığımlarının ümumi həcmində həyat sığortası üzrə mükafatların payı il ərzində 14,25 faizdən 19,5 faizədək artıb.
Bu növlər üzrə ödənişlər də artıb: 2013-ci ilin yanvar-may aylarında 1,69 milyon manat dəyərində dəymiş ziyan ödənilib ki, bu da ötən ilin göstəricisindən 3,45 dəfə çoxdur.
2013-ci ilin 5 ayında şirkətlər istehsalatda peşə xəstəlikləri və bədbəxt hadisələr nəticəsində peşə əmək qabiliyyətinin itirilməsi hallarından icbari sığorta üzrə 16,04 milyon manat toplayıblar. Bu, ötən ilin analoji dövr göstəricisindən 13,6 faiz çoxdur.
Könüllü həyat sığortası üzrə yığımlar il ərzində 2,6 dəfə artaraq 16,83 milyon manata çatıb. Həyat sığortası sahəsində yığımların böyük hissəsi (14,95 milyon manat) ömrün qalan hissəsinin sığortasının payına düşüb. Qalan hissə ölum halının sığortalanması (1,87 milyon manat) və sağalmaz xəstəliklərdən sığortalanma (9,83 min manat) hesabına təmin edilib.
Ötən il könüllü həyat sığortası üzrə 1,1 milyon manat, icbari həyat sığortası üzrə təxminən 600 min manat məbləğində ödənişlər həyata keçirilib.
2013-ci ilin yanvar-may ayları üzrə ölkədə fəaliyyət göstərən bütün şirkətlərin mükafatlarının ümumi həcmi 168,7 milyon manat təşkil edib (il ərzində 16,6 faiz artım), hesabat dövründə ödənişlər isə 48,88 milyon manat (artım 48,4 faiz) olub.
Qeyd edək ki, Azərbaycan Maliyyə Nazirliyinin hesabatında AzRE yeganə təkrarsığorta şirkətinin fəaliyyətinin yekunları göstərilməyib.
