Azərbaycan, Bakı, 9 yanvar /Trend, müxbir E.Əliyev/
2014-cü il fevralın 1-dən Azərbaycanda bank ehtiyatlarına tələblər yumşaldılır. Azərbaycan Mərkəzi Bankının (AMB) bank aktivlərinin təsnifatının və onlara görə mümkün zərərin ödənilməsi üçün xüsusi ehtiyatların yaradılması qaydalarının təsdiq edilməsi haqqında müvafiq qərarı Ədliyyə Nazirliyinin normativ-hüquqi aktlarının reyestrində dərc edilib.
Qaydalara görə, aktivlər standart və qeyri-standart qruplara bölünür. Standart aktivlər qrupuna kafi və nəzarət edilən aktivlər, qeyri-standartlara isə qeyri-kafi, təhlükəli və ümidsiz aktivlər aiddir.
Qüvvədə olan qaydalara görə, əgər kommersiya bankları kafi aktivlər kateqoriyasına aid edilən kreditlərin dəyərinin iki faizi, nəzarət olunan aktivlər üçün 10 faiz həcmində ehtiyat yaratmalıdırlarsa, onda yeni qaydalara görə, tələblər müvafiq olaraq bir və beş faizədək azaldılır.
Aktivlərin qalan kateqoriyaları üzrə tələblər dəyişməz, yəni qeyri-kafi aktivlər üçün 30 faiz, təhlükəli aktivlər üçün 60 faiz, ümidsiz aktivlər üçün isə 100 faiz qalır.
Kafi aktivlərə əsas məbləği və faiz ödəmələri kredit müqaviləsinə uyğun olaraq və ya 30 günə qədər, nəzarət edilənlərə - 31-dən 60 günə qədər, qeyri-kafilərə - 61-dən 120 günə qədər, təhlükəlilərə - 121-dən 180 günə qədər, ümidsizlərə - 180 gündən yuxarı gecikdirmə ilə ödənilən kreditlər aiddir.
