Azərbaycan, Bakı, 20 yanvar /Trend, müxbir İ.Xəlilova /
Bakı Fond Birjası (BFB) səhmdarlarının ümumi yığıncağının qərarı ilə Fariz Əzizov birjanın İdarə Heyətinin yeni sədr təyin olunub. Bu barədə bazar ertəsi Trend-ə Azərbaycan Qiymətli Kağızlar üzrə Dövlət Komitəsindən məlumat verilib.
Bu qərar ötən həftənin sonunda fond birjasının səhmdarlarının ümumi yığıncağında BFB-nin fəaliyyətdə olan sədri Emin Muradovun başqa işə keçməsi ilə əlaqədar qəbul edilib.
BFB İdarə Heyətinin sədri təyin olunanadək Fariz Əzizov Milli Depozit Mərkəzinə (MDM) rəhbərlik edib. Trend-də olan məlumata görə, MDM-in İdarə Heyətinin sədri vakant yerinə Aqşin Cahangirovun təyin ediləcəyi gözlənilir. A.Cahangirov 2011-ci ilin aprelindən indiyədək MDM İH sədrinin birinci müavinini səlahiyyətlərini icra edir.
Əzizov Fariz Nazim oğlu 1978-ci il avqustun 15-də Bakıda anadan olub. 1999-cu ildə Azərbaycan Dövlət İqtisad Universitetinin mühasibat və audit fakültəsini bitirib. Əmək fəaliyyətinə "Azal Siğorta" sığorta şirkətində başlayıb. Son illərdə "Azal Siğorta" ASC-nin İH sədrinin müavini vəzifəsini tutub. 2007-2008-ci illərdə Böyük Britaniyada Lancaster University Business School-da oxuyub və biznesin idarə edilməsi üzrə magistr dərəcəsini alıb. 2009-cu ilin fevralında Milli Depozit Mərkəzinin İH sədrinin müavini vəzifəsində çalışıb. 2011-ci ilin aprelində MDM İN-nin sədri olub. Evlidir.