Azərbaycan, Bakı, 19 may /Trend, müxbir E.Əliyev/
Dünya Bankı (DB) "Sosial müdafiənin inkişafı" layihəsinin başa çatması çərçivəsində Azərbaycanda bu sahədə yeni layihənin hazırlanmasına başlayır. Bunu bazar ertəsi Trend-ə bankın Bakı nümayəndəliyinin rəhbəri Larisa Leşenko deyib.
Yeni layihənin əhatə edəcəyi istiqamətlərə gəlincə, L.Leşenko qeyd edib ki, onlar mövcud layihə başa çatdıqdan sonra nazirliklə birgə müəyyənləşdiriləcək.
DB-də sosial sektorların kuratoru Elvira Anadolu bazar ertəsi Trend-ə bildirib ki, 2008-ci ildən Əmək və Əhalinin Sosial Müdafiəsi Nazirliyinin bank ilə həyata keçirdiyi "Sosial müdafiənin inkişafı" layihəsi beş ilə hesablanmışdı və bu yaxınlarda daha 1 il müddətinə uzadılıb.
Onun sözlərinə görə, mövcud layihə sosial müdafiə, əmək bazarı sisteminin tam modernləşdirilməsini, o cümlədən əlillik sahəsində qanunvericilik, əlilliyin təyin edilməsi üzrə xidmətlərin yenidən təşkili məsələlərini əhatə edir: "Layihə çərçivəsində İsmayıllı rayonunda pilot məşğulluq mərkəzi yaradılıb. Burada tamamilə yeni metodologiya tətbiq edilir və belə mərkəzlərin necə işləməli olduğu nümayiş etdirilir".
E.Anadolu vurğulayıb ki, işin digər istiqaməti ünvanlı sosial yardımdır.
