Azərbaycan, Qəbələ, 24 iyun /Trend, müxbir Zülfiyyə Qurbanova/
Azərbaycan banklarının kredit portfelinin keyfiyyəti böhranaqədərki səviyyəyə qayıdıb. Trend-in məlumatına görə, bunu Azərbaycan Mərkəzi Bankının (AMB) baş direktoru Rəşad Orucov Qəbələdə V Azərbaycan-Rusiya Regionlararası Forumu çərçivəsində keçirilən "Rusiya və Azərbaycan banklarası əməkdaşlığının inkişafı" adlı "dəyirmi masa"da deyib.
Onun sözlərinə görə, portfelin kredit keyfiyyəti yaxşı səviyyədədir - problemli kreditlərin payı 6 faizi ötmür, bu, olduqca aşağı göstəricidir: "Vacibdir ki, belə kreditlərin 80 faizi üzrə artıq ehtiyatlar yaradılıb və idarə edilməyən kreditlərin payı faktiki olaraq təqribən 2 faizdir, biz 2008-ci il göstəricisinə qayıtdıq. Banklardakı kapital yastığını diqqətə alaraq, demək olar ki, vəziyyət sadəcə yaxşı deyil, əladır".
R.Orucov qeyd edib ki, AMB ötən ilin sonunda bankların kaitalına qarşı minimum tələbin 10-dan 50 milyon manatadək artırılması barədə qərar qəbul edib, bundan sonra bankların kapital bazası 76 faiz artıb: "Sevindirici haldır ki, bu artım sabit mənbələr, əsasən səhmdar kapitalı hesabına əldə edilib. Bankların kapitalı 5 il ərzində 2 dəfədən çox artaraq 3,6 milyard manata çatıb".